By Rey Anthony H. Chiu, PIA
CORTES, Bohol, (PIA) — “Better normal” alang sa pagpadagan sa mga buhatan sa kagamhanan, kini maoy aghat sa Civil Service Commission (CSC) ngadto sa mga pangulo, tigdumala, opisyal sa human resources, ug sa mga tigproseso sa public sector, sa pagpabukas na og balik sa mga buhatan sa kagamhanan.
Ang CSC nanawagan sa mga ahensya sa kagamhanan nga magpahiluna na sa mga gikinahanglan nga gimbuhaton sa pagpabukas sa mga buhatan didto sa mga lugar nga gipahimutang na sa Modified Enhanced Quarantine ngadto na sa General Community Quarantine.
Matud sa CSC sa usa ka pamahayag, nga samtang dili mahimong supakon ang mga lagda sa kagamhanan taliwala sa COVID-19 pandemic, kinahanglan usab kini nga motimbang sa panginahanglan nga panalipdan ang kasanihan sa mga trabahante sa public sector ug mga kliyente.
Niini, nanawagan ang CSC sa mga ahensya sa pagpahimutang gayud sa mga lakang pagpanalipod sa dili pa buksan og balik ang mga buhatan.
Kining mga lakang pagpanalipud naglakip sa regular nga pagpamatay kagaw (disinfection), ug decontamination activities, regular nga pagkuha ug pagmonitor sa temperatura sa mga empleyado, ug paghimo og bag-ong office layout aron ikapaneguro ang mga reglamento sa physical distancing.
Gimanduan usab ang mga ahensya nga magbukas na nga estriktong ipatuman ang pagpasul-ob sa mask, pagkuha sa body temperature, pagpahimutang sa sanitation stations sa buhatan alang sa proteksyon sa mga trabahante ug mga kliyente nga giserbisyohan sa buhatan.
Giaghat usab sa CSC ang pagtanyag sa mekanismo nga makasuporta niining mga lakang sama sa psychosocial interventions, pagpanghatag sa personal protective equipment sa mga empleyado ug pagpaneguro nga may kasakyan ug sayun nga kapapauli-an ang mga empleyado.
Mahimo pa gihapon hinuon nga sagopun sa ahensya ang alternatibo nga kasabutan sa pagtrabaho subay sa CSC Memorandum Circular No 10, series of 2020.
Kini mao ang kasabutan sa pagtrabaho una gikan sa balay, pagsagop sa skeletal workforce, upat ka adlaw nga trabahoan sa usa ka semana, o putolputol nga work schedules.
Matud pa, mahimong makapili ang buhatan sa hain man niining mga working schedules subay usab sa mga kahimtang ug kondisyones sa mga lugar nga nagpadayon pa ang kwarantina.
Dugang sa CSC, walay duda, kini ang panahon sa kalisud, og labaw sa tanang higayon, kita nga nia sa goberno nagkinahanglan nga magtan-aw pagbalik sa mga pamaagi sa atong paghatag sa serbisyo, paglansang sa atong mga buot kab-uton, pagdumala sa mga trabahante ug ang pagtimbang sa ilang mga work performance.
Kinahanglan man nato nga moabante na uban sa bag-ong panglantaw sa kasayuran nga dili na magsilbi pa ang kaniadtong mga pamaagi, kinahanglan na ang mga kabag-ohan dili lamang sa pagkab-ot sa atong mga tumong, apan sa pagseguro nga luwas, himsug ug kumitido ang mga empleyado. (rahc/PIA-7/Bohol)