Anaa na sa 110,000 ka magtutungha sa pribado ug pampublikong tunghaan ang naka pa enroll online sigun sa DepEd Bohol Schools Division.
Kini maoy gibutyag ni Desiderio Deligero, ang School Governance and Operations Division chief sa Bohol Schools Division sa Department of Education (DepEd) atol sa pakighinabi sa DyTR news.
Matod ni Deligero nga kini maoy ihap nga nadawat sa DepEd Bohol gikan sa pagbukas sa online ug no face to face contact enrollment gikan adtong Hunyo 1 hangtod Hunyo 8 sa mga lungsod dinhe sa Bohol.
Dugang sa School Governance and Operations chief nga anaa sa 310,000 ka magtutungha ang target nila nga maka enroll alang sa bag-ong tuig-tigtungha 2020-21.
Ang DepEd nitaga og usa ka buwan gikan Hunyo 1 hangtod Hunyo 30 alang sa online ug no face to face contact nga enrollment sa mga motungha alang sa bag-ong school year. DR