By Elvira Bongosia, PIA
Gipahibalo sa Department of Education (DepEd) nga sugod Martes, Hunyo 16, may bag-o nang paagi sa pag-enroll ang mga ginikanan o guardian nga naglisod sa pag-enroll sa ilang mga anak online o pinaagi sa tawag ug text.
“Moving forward, we will continue to conduct remote enrollment, while we will open the drop box system of enrollment,” (Sa pagpadayon, ato nga pagahimoon ang remote nga pagpang enroll samtang atong buksan ang sistema sa paggamit sa dropbox aron makapaenroll), matud pa sa DepEd sa usa ka pahayag nga gipagawas niadtong Lunes, Hunyo 15.
Matud pa sa pahayag sa ahensiya, mahimong mokuha ug maghulog og enrollment forms ang mga ginikanan o guardian sa mga barangay hall o pampublikong tunghaan.
Giingong ibutang usab ang mga marka ug karatula aron masigurong hapsay nga mapatuman ang social distancing samtang naka-istasyon usab ang mga magtutudlo sa enrollment kiosks ug hatagan kini og mga face masks ug disinfectants sa tibuok enrollment period nga molanat hangtod Hunyo 30.
Naa sa work from home arrangement hangtod Hunyo 21 ang mga magtutudlo sa public elementary ug high school, gawas sa mga maghimo sa skeletal workforce.
Kahinumdoman nga wala pa gitugotan sa DepEd ang face-to-face registration aron malikayan ang pagkatap sa coronavirus disease 2019 (COVID-19).
Nagpahinumdom ang DepEd nga usa lamang sa ginikanan sa bata ug kadtong adunay quaratine pass ang gitugotang moadto sa mga drop box kiosks sa buhatan. (ecb/PIA7-Bohol)