By Elvira Bongosia, PIA
Ang Governor Celestino Gallares Memorial Hospital (GCGMH) usa na ka coronavirus disease 2019 (COVID-19) dedicated facility sugod Hunyo 15.
Kini ang gipahibalo sa public advisory nga gipagawas sa GCGMH niadtong Sabado, Hunyo 13, human ang lalawigan nakatala na og ‘local transmission.’
Tungod niini ang GCGMH modawat lamang og mga pasyente nga ‘probable’ ug ‘suspected’ nga kaso sa COVID-19. Naglakip kini sa Moderate and Severe Acute Respiratory Illness (MARI & SARI) nga mga kaso nga e-refer gikan sa Municipal Health Offices (MHOs), Tagbilaran City Health Office ug sa mga pribadong tambalanan.
Ang Emergency Department (ED)- Main and Obstetric- sa maong tambalanan, modawat lamang og ‘urgent’ ug ‘emergent referrals’ gikan sa MHOs, Tagbilaran City Health Office ug sa mga pribadong tambalanan.
Ang GCGMH mitambag usab sa ubang mga ‘walk-in’ nga kaso sa pagpakonsulta sa ilang partner private hospitals sa syudad.
Samtang ang Out-Patient Department (OPD) i-sarado hangtod adunay bag-ong pahibalo.
Ang GCGMH mitambag sa pagpa-reschedule sa mga appointments sa pasyente sa ilang attending physician o sa OPD Reception Desk.
Apan ang PMDT-TB DOTS Clinic ug HIV/AIDS Treatment Hub walay apil ug magpabiling abli base sa advisory.
Subling gipasalig sa GCGMH ang ilang papel isip Apex Referral Center sa lalawigan sa Bohol, isip chief implementor sa mga programa ug protocols sa Department of Health (DOH) nga nakigbugno sa COVID-19.
Ang tambalanan nangayo og pagsabot sa publiko sa ilang pagbalhin niiing bag-ong yugto sa mga mosunod nga adlaw.
“We shall be issuing bulletins as development arise,” matud pa sa hinapos nga pahayag sa GCGMH. (ecb/PIA7-Bohol)