By Elvira Bongosia, PIA

Giawhag ni Gob. Arthur Yap ang mga mulupyo sa hugot nga pagsunod sa mga gidili ubos sa gipatuman nga general community quarantine (GCQ) sa lalawigan nga molanat taman Hunyo 30, 2020.

Kini human nakatala ang lalawigan sa Bohol og 15 ka kaso sa coronavirus disease 2019 (COVID-19) niadtong Martes sa hapon, Hunyo 16.

Si Yap nikumpirmar sa usa ka bag-ong nagpositibo sa COVID-19 infection niadtong Martes sa gabii.

“Ayaw kabalaka sa sitwasyon nga naay nadugang sa mga nagpositibo. Huna-hunaon nato nga 1,592 na ang atong napauli sa ilang mga panimalay ug nakahuman na sa ilang 14-day quarantine samtang 2,594 ang nakakwarantina ug padayon natong gibantayan,” matud pa ni Yap.

Gidugang pa sa gobernador nga ang importante musunod ang tanan sa pahimangno sa makanunayon nga pagsunod sa protocol kabahin sa minimum health standards sama sa Social Distancing, pagsul-ob sa facemask ug pagbaton ug kalimpyo ug labaw sa tanan, magpujo sa balay kung walay importanteng lakwon.

Ang provincial government of Bohol Facebook page nitaho sa 15 ka kumpirmadong kaso sa COVID-19 nga gilangkoban sa 7 ka active cases, 7 ka recoveries ug 1 ang namatay.

Ang pito ka aktibong kaso naglakip sa 3 ka locally stranded individuals (LSIs) gikan sa Tagbilaran, 2 health workers gikan sa pribadong ospital, 1 LSI gikan sa lungsod sa Candijay ug 1 LSI gikan sa lungsod sa Sagbayan.

Samtang ang pito nga recovered patients naglakip sa babayeng Chinese, 3 ka health workers gikan sa Gov. Celestino Gallares Memorial Hospital (GCGMH), 2 ka overseas Filipino workers (OFWs) ug ang 65 anyos nga babaye gikan sa Barangay Dao sa syudad sa Tagbilaran.

Ang nag-inusarang namatay mao ang 89 anyos nga lalaki gikan sa lungsod sa Calape.

Kahinumduman nga gilagdaan sa gobernador ang Executive Order No. 31 niadtong Hunyo 12 apan gipagawas lamang kini niadtong Hunyo 14.

Mahimong epektibo ang maong EO sa Martes, Hunyo 16, 2020.

Samtang gipaubos usab sa GCQ ni President Rodrigo Duterte ang lalawigan sa Bohol niadtong Lunes sa gabii, Marso 15.

Nakalatid sa EO 31 nga ang mga mosunod magpabiling ipatuman: pagsunod sa minimum health standards, general curfew gikan alas 9 sa gabii taman alas 5 sa buntag, polisiya sa home quarantine pass, home quarantine sa mga senior citizens ug kabataan, regulated operation sa mga business establishments, partial liquor ban, ug uban pa.

Apan gitugotan na base sa maong EO ang dine-in operations sa mga restaurants, fast food chains ug susamang mga katukuran diin gi-limitahan lamang ngadto sa 30% sa seating capacity.

Ang church services o pagsimba gitugotan lamang sa 25% sa seating capacity sa mga simbahan. Apan ang selebrasyon sa mga pista ipadayon gihapong personal ug pribadong pamaagi.

Niadtong Domingo, Hunyo 14, gipahigayon na ang selebrasyon sa mga misa sa mga Katolikong simbahan sa Bohol, human ang halos tulo  ka buwan human gipatuman ang enhanced community quarantine (ECQ) sa gobyerno aron mapugngan ang pagkatap sa coronavirus disease 2019 (COVID-19).

Sa pagkakaron, ang gidaghanon sa natalang kaso sa COVID-19 sa Bohol nisaka na ngadto sa 10 gikan sa 4 ka natalang kaso sa niaging lima ka buwan.

Si Yap nipahibalo niadtong Domingo sa upat ka locally stranded individuals (LSIs) nga nagpositibo sa COVID-19, gawas pa sa laing 2 ka health workers nga gipahibalong nagpositibo usab sa maong sakit niadtong Biyernes sa niaging semana. (ecb/PIA7-Bohol)