SAKAAN ni Gob. Arthur Yap ang kapasidad sa mga mag-uuma ning panahon sa pandemya nga gitugbangan sa hagit sa igong kaugalingong suplay sa pagkaon.
Giapud-apud ni Yap ang mga binhi sa hybrid nga humay sa mga sakop sa tulo ka mga irrigators association sa lungsod sa Ubay sa imaging adlaw.
Nalipay ang mga maghuhumay sa dakong agrikulturang bahin sa Segundo Distrito nga ang gobernador mao mismoy nakatabang kanila.
Nagpasalamat ang GABIBU Irrigators Association, SANLIP RALIP Irrigators Association ug SANBABUE Irrigators Association pinangunahan sa ilang mga president nga sila si Felix Penaso, Javier Flores ug Nerio Genita.
Importante kang Gob. Yap ang seguridad sa pagkaon ning di kasarangan nga krisis kay gani naplano na niya ang Advanced Rice Technology (ART) sa wa pa ang COVID-19.
Gitutokan niya ang produksyon sa pagkaon samtang nagpahiluna sa pag-establisar og mga containerized RT-PCR laboratory sa tugpahanan og mga dagkong pantalan sa Bohol.
Sa wa pa siya nanghatag og binhi sa taas og klase nga humay, ang gobernador nihatud sa suhol sa goberno ngadto sa mga mag-uuma ubos sa iyang Cash-for-Work program.
Ang mga mag-uuma sakop sa Lumanoy Central Communal Irrigation System (CIS) Association sa Lombog sa Guindulman ug Tabuno-San Isidro CIS Association sa Mabini.
Gisuholan sila sa kagamhanan sa probinsiya sa paghinlo ug pag-ayo sa kaugalingon nilang sistema sa irigasyon. Ven Rebo Arigo