Ang Ika-13 nga Domingo sa Tuig (A)
Hunyo 28, 2020
EBANGHELYO (Mateo 10:37-42)
Si Jesus miingon sa iyang mga tinun-an: 37 “Ang nagmahal sa iyang amahan o sa iyang inahan labaw kanako, dili angay kanako; ug kadtong nagmahal sa iyang anak labaw kanako, dili angay kanako. 38 Ang dili mopas-an sa iyang krus ug mosunod kanako, dili angay kanako. 39 Ug kadtong mag-amping sa iyang kinabuhi, kawad-an hinoon niini; apan ang kawad-an sa iyang kinabuhi tungod kanako, makabaton niini.”
40 “Ang modawat kaninyo, modawat usab kanako; ug ang modawat kanako, modawat usab kaniya nga nagsugo kanako. 41 Ang modawat sa sinugo sa Dios tungod sa iyang pagkasinugo sa Dios, gantihan usab sa ganti nga madawat sa sinugo; ug ang modawat sa tinuod nga maayong tawo, tungod sa iyang pagka-maayong tawo, gantihan usab sa ganti nga madawat sa maayong tawo. 42 Ug hinumdomi kini: kadtong magpainom bisan na lag bugnawng tubig sa labing ubos sa akong mga sumusunod, tungod kay siya akong sumusunod, gantihan gayod.” ANG EBANGHELYO SA GINOO.
oOo
KAHULOGAN SA EBANGHELYO (Mt 10:37-42)
Si Jesus miingon sa iyang mga tinun-an: 37a “Ang nagmahal sa iyang amahan o sa iyang inahan labaw kanako, dili angay kanako;
Pagkalisod nga sabton. Daw samag dili makitawhanon! Usahay masaypan gani sa tinuoray nga pagsabot. Dili gayod katuhoan nga si Jesus motudlo sa mga kabataan sa dili pagmahal sa
nga sugo sa Dios nagpabilin pa: “Higugmaa ang inyong mga amahan ug inahan.” Si Jesus mismo mihatag og panag-ingnan sa hingpit nga pagsugot ngadto sa iyang inahan (basaha sa Lukas 2:50; Juan 19:26-27). Siya usab mihisgot man gani nga ang pagsuporta sa mga ginikanan mas mahinungdanon pa kay sa paghalad sulod sa Templo” (Mt. 15:3-6).
Unsa man gayod kaha ang kahulogan niining maong panultihon nga gilitok usab ni Jesus? Tuyo gayod ni Jesus nga iyang makusganong ipasabot nga kon bahin na gani sa pagsunod kaniya, mas mahinungdanon gayod siya kay sa mga tawo nga angayan sa atong labing tiunay nga paghigugma—sama sa atong mga ginikanan. Dili gayod himoong babag ang atong mga ginikanan diha sa paghukom sa pagsunod sa Dios.
Sa tinuoray, makadaghan kini mahitabo nga ang atong mga ginikanan usahay maoy mobabag sa mga tinguha sa mga anak sa pagsunod kang Kristo.
37b ug kadtong nagmahal sa iyang anak labaw kanako, dili angay kanako.
Kining maong ikaduhang panultihon susama sa nahiuna. Kini nakadugang lamang sa kabug-at sa pahayag ni Jesus. Walay bisan kinsa nga molabaw pa sa atong pagmahal sa Dios. Siya lamang ang anaa sa unang luna sa atong paghigugma. Kay kon ang Dios maoy atong gihatagan sa labing unang dapit sa atong kinabuhi dili na lisod ang paghigugma sa uban. Ang tinuod nga paghigugma sa Dios mao man ang magatukmod kanato sa paghigugma sa atong mga isigkatawo.
38 Ang dili mopas-an sa iyang krus ug mosunod kanako, dili angay kanako.
Bisan diay ang atong kaugalingon kinahanglan usab nga isalikway kon buot kita nga mosunod kang Jesus.
Si Jesus dili gayod makasulti niini kon wala pa kini sinatia niya mismo. Siya mao ang unang mipas-an niining maong krus. Ang atong pagpas-an sa atong matag usa ka krus mao ang pagsunod sa panag-ingnan ni Jesus.
Dili unta kita masayop sa pagsabot sa kahulogan niining maong krus. Dili kini mao ang krus nga atong makita sa atong mga altar, o kanang krus nga anaa sa tumoy sa atong mga rosaryohan. Dili kini ang krus nga atong gihimong mga dayandayan nga anaa sa kwentas, ariyos, o singsing. Ang krus nga gipasabot niini mao ang “bug-at nga Krus”—mga panghitabo sa atong kinabuhi nga malisod, mga suliran, mga kasakitan. Dili ikalimod nga adunay mga krus diha sa matag usa kanato.
Unsa may mga bug-at nga krus nga akong gipas-an karon? Unsa may akong mga gibati sa akong pagpas-an niini? Nakapaduol ba o nakapalayo ba kini kanako sa Dios?
39 Ug kadtong mag-amping sa iyang kinabuhi, kawad-an hinoon niini; apan ang kawad-an sa iyang kinabuhi tungod kanako, makabaton niini.”
Sukwahi kini sa unsay gipasiatab sa modernong panghunahuna sa atong panahon karon: nga atong ugmaron labaw sa tanan ang atong kaugalingon; nga atong isipon ang atong kaugali-ngong personal nga katungod labaw kay sa bisan unsang konsiderasyon. Lahi ang kang Kristo: Iya nga ipadumili o ipasalikway ang kaugalingon.
Kadto lamang mahibalo nga magsalikway sa kaugalingon, ang makakat-on sa paghigugma sa uban.
Wala kini magpasabot nga magpaitoy-itoy lamang kita. Hinoon nagpasabot kini nga barogan ta ang unsay angayan ug matuod, unsay maayo ug alang sa kaugmaran sa katilingban, bisan pa kon sa paghimo niini nagkinahanglan og dakong sakripisyo sa kaugalingon.
Ang pagtaya o paghatag sa hingpit sa kaugalingon sa walay kukahadlok mao ang gipangayo ni Kristo, bisan pa kon adunay dakong presyo sa maong pagtahan sa kaugalingon. Dili sayon ang pagsunod ni Kristo kay naghagit man kini og pagpas-an sa krus, gani sa uban pagpakamatay man tungod sa kawsa nga gibarogan—ang kawsa nga iya usab kang Kristo!
Mao na ba kini ang anaa sa akong hunahuna ug pagbati sa akong pagsunod kang Kristo?
40-42 “Ang modawat kaninyo, modawat usab kanako; ug ang modawat kanako, modawat usab kaniya nga nagsugo kanako…
Usa ka pagtulun-an sa gugma. Ang nagbaton og paghiguma sa isigkatawo nagbaton usab og paghiguma sa Dios. Ang gugma mapakita pinaagi sa mahinangpon nga pagdawat o pag-abi-abi.
Adunay tulo nga angay dawaton: 1) ang mga sinugo sa Dios; 2) ang maayong tawo; ug 3) ang labing ubos.
Kadtong nagbuhat og kaayo ngadto kanila, mipasalig si Jesus nga sila gantihan gayod sa Dios!