TUOB
Ang tuob nga gikagubtan,
Paagi sa pagtambal nga kinaraan,
Gigamit ni sa atong katiguwangan,
Epektibong tambal sa butod sa tiyan.
Gi-ubo, gisip-on o ba kaha hilantan,
Ang pasyente dili dalhon sa tambalanan.
Hino-on sa habol kini bokutan,
Sa mainit nga alis-ngaw pa-asohan.
Mogawas ang singot nga hilabihan,
Apil na ang toxic sa kalawasan,
Human sa tuob mura ka’g nahuwasan,
Ang kaga-an sa lawas mabatyagan.
Ang tuob gamay ra ang gasto,
Bahaw, asin ug luy-a tulo ka piraso,
Pabukali diha sa kaldero,
May tambal ka na sa impatso ug pasmo.
Karon ang tuob gilantugi-an.
Dunay mo-ingon tambal sa sakit sa ginhawa-an,
Duna say misupak basin sa aso nuon matuk-an,
Sulaye lang aron inyong mahibaw-an.