Ni Rey Anthony H. Chiu, PIA
Gibuksan man og balik ang mga simbahan sa 25 porsyento nga kapasidad niini aron ikapasalig nga mapatuman ang social distancing, bag-ong normal na niini ang pagfill-up sa Contact Tracing Forms sa tanan nga manimbahay.
Kini ug daghan pa nga mga gikinahanglang buhaton sa manimbahay ang gipatuman usab sa mga kadagko-an sa simbahan aron pugngan ang pagkatap sa kagaw nga maoy kina-ingnan sa pagpanakod ug pagkamatay sa daghanang mga Pinoy.
Sa pipila ka mga simbahan sa Bohol, ang pagfill-up sa contact tracing form maghatag usab sa usa ka manimbahay sa iyang tumbok nga luna lingkoran nga labing menos duha ka metros sa labing duol nga manimbahay.
Ang contact tracing form magpasayun sa pagtumbok kon kinsa nga mga tawhana ang nagduol og lingkod ug kon pananglit may nasakit, sayun ra ang pagtudlo kon kinsay posible nga natakdan.
Sa gihapon, inig abut sa pultahan sa simbahan, may mga tawo nga magkuha sa body temperature sa manimbahay, kadtong ming rehistro nga may timailhan sa hilanat, ipadala dayun sa mga health center ug dili na pasimbahon.
Dili usab makasulod sa simbahan kon walay gisul-ob nga maskara, ug dili gyud tangtangon ang maskara gawas sa pagkalawat na, unya itaud og balik dayon.
May mga alcohol disinfection usab nga mahitabo sa ganghaan sa simbahan samtang may gipahimutang nga mga disinfection stations diin may alcohol ug hand sanitizers sa mga lamesa nga gibutang sa kilid sa mga agianan sa simbahan.
Bisan pa niini, mipahinumdom pa gihapon ang mga tinugyanan sa simbahan ngadto sa mga manimbahay nga magdala permi og alcohol ug mga sanitizers, aron makapamatay kagaw sa tanang higayon.
Gidili na usab ang paghalad sa simbahan, kay kini magbukas sa kahigayunan sa pagsupak sa social distancing, matud sa mga tinubdan.
Hinuon, kadtong buot mohalad, mobilin sa ilang halad ngadto sa mga lamesa nga gibutang sa kilid sa simbahan, aron usa lamang pagkuha niini aron mahalad sa altar.
May mga tinugyanan usab nga mag-alayon sa mga manimbahay ug mogiya kanila paingon sa mga lingkoranan ug sa panahon sa pangalawat.
Ug aron wala nay magsugat nga makasupak sa social distancing, kadtong mokalawat, molibut sa mga agi-anan sa kilid human mokalawat gikan sa tunga nga agianan sa simbahan.
Sa paggawas usab, may mga gitumbok nga pultahan nga gawasan, dili sa pultahan nga gisudlan, aron dili makasugat sa mga buot mosulod.
Human sa mga misa, maghimo ang mga tinugyanan sa simbahan sa disinfection, sa dili pa buksan ang simbahan sa lain na usab nga misa.
Ug aron dili magdungan og han-ok sa usa ka misahan, gimandu na sa Obispo sa Tagbilaran nga ang tanan nga misa human sa paniudto sa Sabado, isipon na nga anticipated ug Sunday Mass, samtang gipangpun-an ang kadaghanon sa mga misa aron walay mawani sa labing taas nga matang sa pag-ampo. (rahc/PIA-7/Bohol)