Sinulat ni Elvira Bongosia
Milusad ang Philippine Health Insurance Corporation (PhilHealth) ug bag-ong online facility alang sa mga miyembro niini diin mahimong makita ang ilang contribution records.
Gipahibalo sa Philhealth nga pinaagi sa “PhilHealth Member Portal” makita ug maberipika ang mga impormasyon sama sa pangalan, adlaw’ng natawhan, gipuy-an, ug uban pa.
Gawas niini, mahimo usab maka-download ug makapa-print ug Member Data Records (MDRs) alang sa mga nanginahanglan niini.
Kinahanglan lamang nga moadto sa portal sa PhilHealth website ang usa ka miyembro aron makahimo ug account.
Samtang subling gipahinumdoman usab sa PhilHealth ang mga miyembro niini nga mag-amping sa mga nikatap nga mga fixer online nga nagtanyag ug serbisyo sa maong buhatan.
Giklaro sa PhilHealth nga walay bayad ang pagkuha ug PhilHealth ID ug Member Data Record (MDR).
Matud pa nga hingpit nga gidili ang fixing ubos sa Ease of Doing Business and Efficient Government Service Delivery Act of 2018.
Ang bisan kinsang masakpan naghimo niini mahimong magmulta ug hangtod P2 milyon o pagkabilanggo ug hangtod 6 ka tuig.