Ni Elvira Bongosia, PIA
Gidayeg ni Presidential Communications Operations Office (PCOO) Kalihim Martin Andanar ang food security program sa lalawigan sa Bohol.
Kini human nadungog mismo ni Andanar gikan ni Gobernador Arthur Yap ang nagkalain-laing programa sa Kagamhanang Probinsiyal sa Bohol ilabi na ang planong programa sa kasigurohan sa pagkaon sa lalawigan.
Atol sa Network Briefing Program sa PCOO ni Andanar pinaagi sa Zoom niadtong Hunyo 19, gitumbok ni Yap ang panginahanglan sa pagtutok sa lalawigan sa kasigurohan sa pagkaon taliwala sa coronavirus disease 2019 (COVID-19) pandemic ubos sa gitawag nga “new normal.”
Sa maong interview, si Yap miingon nga ang Bohol dili usa ka lalawigan nga adunay halapad nga yutang angay nga pang-agrikultura mao nga adunay panginahanglan sa pagkuha sa gikinahanglang gidaghanon sa ani gikan sa magamit nga mga yuta nga gigamit sa agrikultura.
Kalabot niini, gibutyag sa gobernador ang Advanced Rice Technology (ART) 120 program isip paagi sa pagpalambo sa ani gamit ang “certified inbred seeds” diin ang katuyoan matud pa ni Yap mao ang maka-ani og 120 ka kaban matag ektarya ubos sa maong programa.
Sa mga irrigated nga lugar, ang programa gitawag og ART 160, diin ang target maka-ani og 160 ka kaban matag ektarya gamit ang hybrid nga mga binhi.
Aron pagsuporta sa industriya sa livestock ug aquaculture, si Yap miingon nga ang pokus nakabutang sa produksiyon sa mais diin mga 15,009 ka ektarya ang gigamit alang sa produksiyon sa mais alang sa pagkaon sa industriya sa kahayopan ug aquamarine.
Nakasabot usab ang gobernador sa papel sa ‘feeds industry’ sa paglambo sa industriya sa kahayopan ug aquamarine sa lalawigan mao nga isip pagsulbad sa suplay sa mga isda, si Yap mibutyag nga ang lalawigan nangita ug mokombertir sa wala gigamit nga mga kabasakan ngadto sa fish ponds.
Gibanabanang mga 1,000 ka ektarya sa mga wala gigamit nga kabasakan ang himuong fish ponds nga adunay igong suporta gikan sa probinsiyal nga kagamhanan.
Gawas pa niini, gihatagan usab og prayoridad ang nagkalain-laing proyekto sa patubig isip pagpakusog sa produksiyon sa mga gulay sa lalawigan.
Apil usab nga gitan-aw ang sistema sa irigasyon (communal) sa tibuok lalawigan.
Labaw sa tanan, si Yap nagkanayon nga ang pagpakusog sa kalihokan, usa ka paghatag og kasigurohan sa igong suplay sa pagkaon bisan unsa pa ang mahitabo sa umaabot agi og pakigbugno sa pagkuyanap sa COVID-19 virus.
Sa maong interview, si Andanar mipadayag sa iyang tinguha sa pagbisita sa Bohol aron makita niya mismo ang mga implementasyon sa nagkalain-laing programa sa kagamhanang probinsiyal. (ecb/PIA7-Bohol)