Ni Elvira Bongosia, PIA
Nisulat si Gobernador Arthur Yap kang Presidente Rodrigo Duterte nga naghangyo sa pagmando sa Bangko Sentral ng Pilipinas (BSP) sa pagtugot sa mga bangko sa pag-implementar og usa ka tuig nga moratorium sa pagkolekta sa pautang ug pagtanyag og ‘debt restructuring’ alang sa mga sektor sa transportasyon nga naapektuhan sa coronavirus disease (COVID-19) nga pandemya.
Kini ang gibutyag sa gobernador atol sa gipahigayong press conference niadtong Hunyo 22 didto sa New Provincial Capitol, ning syudad.
Kahinumdoman nga ang sektor sa transportasyon sa lalawigan ilabi na kadtong naa sa sektor sa turismo ang labing naigo sa pandemya diin gikahadlokang mabangkarota kun padayon sila magbayad sa utang samtang ang ilang mga negosyo sirado gihapon tungod sa pandemya.
“Of course nagpasalamat ta sa Bayanihan To Heal as One Act na gitagaan ang mga negosyante ng possible two months na grace period, pero human ana, on the third month ang pangutana ‘mo balik na ba ang mga negosyo?’ No. Mao on the third month, kung pugson nato na magbayad na ang mga transport sector members, sigurado they will go bankrupt,” matud pa ni Yap.
Si Yap nga kanhi chair sa House of Representatives On Economic Affairs Committee nagkanayon nga ang maong lakang maka-benepisyo usab sa mga negosyante sa industriya sa transportasyon sa tibuok nasod, dili lamang sa Bohol.
Matud pa sa gobernador nga ang iyang sugyot nakakuha og suporta gikan sa Regional Development Council (RDC) 7 ug sa League of Provinces of the Philippines (LPP) diin ang duha ka organisasyon mipadayag sa ilang suporta pinaagi sa Resolution No. 21 ug Resolution No. 2020-010.
Apan gitumbok ni Yap nga ang maong inisyatiba nagkinahanglan man nga paluyohan sa Presidente tungod kay siya lamang ang maka-mando ngadto sa BSP sa paghatag og pagtugot sa mga bangko sa pag-restructure sa mga loans.
Sa lalawigan sa Bohol, adunay 35 ka sakop sa transport groups nga naglangkob sa 458 filcabs, 349 GT Express units, 258 mini-buses ug buses ug 816 public utility jeeps.
Apil usab sa sektor sa transportasyon ang mga tourist vans, coasters ug buses nga mokabat ngadto sa 578. (ecb/PIA7-Bohol)