By Rey Anthony H. Chiu, PIA
TAGBILARAN CITY, (PIA) –- “Ayaw gyud kalimot sa pag-coordinate sa inyong mga local Government Units (LGUs), kon manguli na kamo dinhi.”
Kini maoy aghat-pahinumdom sa mga tinugyanan sa Civil Aviation Authority of the Philippines (CAAP) pinaagi ni Frank Tayag, CAAP Bohol Panglao International Airport (BPIA) supervisor.
Kini nga panawagan gipalanog ni Tayag nunot usab sa mga kasinati-an nga nakita sa CAAP samtang ang BPIA nagpadayon sa pagpanawat sa mga locally stranded individuals (LSIs) nga manguli na dinhi sa Bohol.
Kahinumduman nga usa sa mga palisiya nga gisagop sa Bohol alang sa mga mamauli nga LSI mao ang pagpakig coordinate sa mga LSI Focal Persons sa mga kalungsuran aron mapasayon ang proseso sa pagdawat sa nasampit nga LSI.
Ang Focal Persons kinsa maoy mas nasayud sa kahimtang sa LGU operated quarantine facilities, mao usab ang makarekomendar kon may bakante ba, kon may pwesto ba nga temporaryo nga kapuy-an sa LSI samtang ipailawom sa 14 ka adlaw nga kwarantina.
Ang Focal Persons usab maoy mag coordinate alang sa local nga team kinsa maoy mosugat sa LSI gikan sa airport ug derecho na sa quarantine facility.
Sa kasinati-an sa CAAP, matag tugpa sa mga eroplano nga luwanan sa mga LSI, aduna silay espesyal nga lugar nga gitagana isip holding room sa mga nanguli nga Bol-anon.
Samtang nagfill-up ang matag usa sa mga dokumento nga sudlan sa mga personal nga kasayuran, usa usahon og tawag ang mga moluwan sa mga sakyanan nga giandam sa LGU focal person alang sa mga manguli.
Dinhi, kon wala mahitabo ang coordinasyon, ang LSI mahimong magpaabut sa wala kay wala may mokuha kanila gikan sa airport ug dili usab pagawason sa CAAP sa airport kon walay segurado nga kasakyan nga gitugotan sa LGU.
Tungod niini, sa ilang kasinati-an, diha nay LSI nga nakabuntagan gyud og pinaabut apan wala diay mapahiluna sa ilang LGU.
Ug sanglit ang CAAP walay tukma nga accommodation alang sa mga pasahero, nakita nila ang lisud nga sitwasyon.
Hinuon matud ni Tayag, dili usab kaayo daghan ang nakasakay nga wala dayun makuha sa mga LGUs, apan bisan pa, gipaneguro sa CAAP nga ang ilang serbisyo maglangkob sa pagpahiluna sa pasahero timbang sa pagseguro usab nga luwas ang mga trabahente sa airport ug mga lumalabay nga pasahero sa mga LSI nga nagpaabut pa nga kuhaon sa mga sakyanan sa ilang LGUs. (rahc/PIA-7/Bohol)