Sinulat ni Elvira Bongosia
Adunay pahinumdom ang Department of Health (DOH) sa pagdaghan sa mga community pantry sa nagkalain-laing dapit sa nasud.
Matud pa sa tigpamaba sa DOH nga si Usec. Ma. Rosario Vergeire, maayo ang mga gihimo sa mga community pantry nga nitabang sa mga nanginahanglan karong adunay pandemya.
Apan matud pa niini nga kinahanglan pa gihapon kining bantayan aron masiguro nga dili kini pamultahon sa pagtakod-takod sa coronavirus disease (Covid).
Pahinumdom pa ni Vergeire, kinahanglang may ipatumang sistema aron dili magtapok ang mga tawo nga mopila sa community pantry.
Dugang pa niini, kinahanglang mosunod pa gihapon ang tanan sa minimum health standards sama sa pagsuot face mask, face shield ug social distancing.
Dinhi sa lalawigan sa Bohol, pipila na usab ka community pantry ang gibuksan.
Usa niini ang Bohol Community Pantry nga gibuksan sa Diocese sa Tagbilaran niadtong Huwebes, Abril 22, 2021.
Kining community pantry sa simbahan, namugna pinaagi sa pakigtinabangay sa mga batan-ong negosyante sa Bohol.
Libreng gipanghatag sa maong pantry ilabi na sa mga kabus nga apektado sa Covid ang mga pagkaon sama sa bugas, itlog, mga instant noodles, mga utanon ug prutas.
Simple lamang ang angay hinumdoman dinhi “mohatag sa makaya, mokuha base lamang sa panginahanglan.”