By Elvira Bongosia, PIA
Gikumpirmar ni Department of the Interior and Local Government (DILG) Kalihim Eduardo Año nga mahimo nang mo-angkas sa mga motorsiklo ang mga magtiayon o live-in partners sugod niadtong Biyernes, Hulyo 10.
Kinahanglan lamang nga butangan og protective shield sa taliwa sa duha ka nagsakay base sa mga sumbanan nga gitakda sa Inter-Agency Task Force for the Management of Emerging Infectious Diseases (IATF-MEID).
“Simula July 10, papayagan na natin ang back-riding ngunit sa couples lang muna. Alam naman natin ang sitwasyon ngayon, tumataas ang bilang ng mga positive cases. At least ang couple ay nakatira sa iisang bahay lang ‘yan,” matud pa sa pahayag ni Año.
Matud pa sa kalihim nga bisan gitugotan na ang pag-angkas, angay pa gihapong huna-hunaon sa publiko ang mga protocol nga gitakda sa IATF diin kauban na ang pagbutang og protective barrier sa motorsiklo.
Giingong ang pagsuot og face mask, hugot pa gihapong gipatuman sa mga otoridad.
Gibutyag ni Año nga ang prototype design nga gisumiter ni Bohol Gob. Arthur Yap ang gitugotan sa National Task Force for COVID-19 ug kini ang sundogon.
Kahinumdoman nga niadtong tunga-tunga sa Hunyo, giduso ni Yap ang pagbutang og protective barrier taliwala sa duha ka pasahero sa motorsiklo aron madayon ang pag-angkas nga dili igsapayan ang kahimsog ug kahilwasan.
Gipahinumdoman ni Año ang publiko nga tungod kay nabag-o ang disenyo sa motorsiklo, angay mag-amping ang mga mosakay.
Kinahanglang magpakita og kamatuoran ang mga nag-angkas nga magtiayon o mag-live-in partners sila. Angay nga pareho ang apelyido sa magtiayon ug pareho og address ang mga live-in partners. (ecb/PIA7-Bohol)