Ni Rey Anthony H. Chiu, PIA
. Lakip sa P180 M Relief Assistance Program ang P50 million nga itabag sa pagpapauli sa mga Bol-anon nga OFW ug LSI nga nangatanggong human ipagawas ang mandu sa pagsira sa mga utlanan sa Bohol. Gawas pa niana, mga food subsidy, food vouchers, milk feeding ug tabang alang sa Boholanos offshore ang nahilakip sa pahat. (rahc/PIA-7/Bohol)
Mingkabat na sa P180 milyones ang napagawas sa Bohol subay sa Relief Assistance Program niini ilawom sa We Survive as One Bohol Program.
Kini maoy unod sa taho ni Provincial Planning and Development Officer Atty. John Titus Vistal sa katapusang virtual nga tigum sa Bohol Inter-Agency Task Force Strategic Communications Cluster niadtong mi-aging semana.
Matud ni Manlalaban Vistal, ang Relief Assistance Program nagalangkub usab sa daghang nga parte nga naglakip sa Ayuda sa pagkaon (Food Assistance), Mga Food Vouchers nga ibalyo sa basura nga mahipos sa banay, Programa sa pagpa-inum sa gatas ngadto sa mga bata (Milk Feeding program), Hinabang salapi sa mga Bol-anon nga nangatanggong sa gawas sa Bohol tungod sa kwarantina ug sa programa sa Pagpapauli sa mga taga Bohol.
Butyag ni Atty. Vistal, nga sa Food Assistance Program o sa Ayuda sa Pagkaon, giingon nga napulo ka kilo nga Premium Rice ang madawat sa 300,000 ka Bol-anon nga banay.
Kini may kinatibuk-an nga P 150,000 nga pahat ug karon moabut na sa 337,220 ka mga banay, matud pa ni Atty. Vistal sa iyang taho sa BIATF.
Sa laing bahin, mga gipasugdan ang Bohol nga Food Vouchers nga ibaylo sa matag 20 ka kilo nga basura nga plastik sa labing apektado nga mga banay sa 111 ka kabarangayan nga naa sa daplin sa kadagatan.
Gipasabut ni Atty. Vistal nga sa pundo nga gipahat nga P2,775,000.00, nanghinaut ang mga tinugyanan sa Bohol nga makubsan ang epekto sa panginabuhi-an sa mga banay nga nahiagum sa mga paghugot sa mga sistema sa pagpanglakaw ug pagpangitag kabuhi-an dala sa COVID-19 health crisis.
Niini, makab-ot pa sa lalawigan ang mas limpyo nga kabaybayonan, may makuha pa usab nga pagkaon ang mga kabus.
Gibanabana nga 50 ka mga banay nga nagagikan sa 111 ka barangay o kinatibuk-an nga 5,550 ka banay ang makabenepisyo niini.
Sa Community Milk Feeding program, matud ni Atty. Vistal nga P6,658,000 ang kinatibuk-an nga budget nga gipagawas alang niini ug mikabat na sa 10,219 ka benepisaryo ang nakapahimulos niini.
Partikular nga tumong sa maong nahisgutang Feeding program ang mga bata nga kuwang sa timbang, mga pre-schoolers sa 17 ka kalungsuran, mga sakop sa medical team, kapolisan ug quarantine team sa Bohol.
Alang sa ayuda sa mga Bol-anon nga nangatanggong sa gawas sa Bohol nga wala maka-uli tungod sa pagsira sa mga utlanan, nagpahat ang Bohol og tag P2,000 sa matag offshore Boholanos.
Una nga gibanabana nga ang benepisaryo niini moabut sa 7,500 apan, dugang ni Atty. Vistal, ming-abut na sa 10,383 ka offshore Boholanos ang ilang nahatagan sa total nga pundo nga P20,978,580, nga kaniadto, P15,000,000 lamang nga gipahat.
Sa katapusan, alang sa Programa sa mga nanguli nga mga Bol-anon, may gipahat ang Bohol nga P50 milyones, ug kasamtangan nga nakabenepisyo niini ang 8,320 ka mga locally stranded individuals ug returning Boholanos gikan sa tulo ka mga distrito sa Bohol.
Kinatibuk-an nga P 180 milyones ang kasamtangan nga nagamit sa Bohol alang lamang niining Programa sa Food and Relief Assistance sa We Survive as One Bohol. (rahc/PIA-7/Bohol)