Siyam ka bag-ong kumpirmadong kaso sa Covid-19 natala sa Bohol niadtong Martes, Agosto 4, 2020.
Matod ni Governor Art Yap nga ang Department of Health (DOH) nipahibaw nga adunay 9 ka bag-ong kaso ang lalawigan sa Bohol.
Ang 9 ka bag-ong kumpirmadong kaso sa coronavirus disease gilangkoban sa duha ka Locally Stranded Individual (LSI) nga taga Bilar, duha ka LSI nga taga Trinidad, tulo ka LSI, usa ka OFW nga taga Tagbilaran ug 1 ka Authorized Person Outside Residence (APOR) nga naa sa Tagbilaran.
Matod ni Yap nga iya nang gipahibaw ang mga mayor sa hingtungdang lungsod ug dinhe sa Tagbilaran kalabot sa maong resulta gikan sa DOH.
Nagpabilin nga gi-isolate ang mga pasyente sa ilang tagsa-tagsa ka mga isolation centers sukad sa ilang pag-abot dinhe sa atong lalawigan hangtod karong panahona.
Dugang pa ni Yap nga kauban sa report sa DOH mao ang usa ka repeat polymeraee chajn reaction (PCR) test sa usa ka taga Tagbilaran nga nagpositibo gihapon sa Covid-19.
Subay niini, nakig-alayon na ang Provincial Health Office (PHO) sa mga Rural Health Units (RHU) aron sa pagpahigayon sa contact tracing.
Padayong aghat ni Yap nga dili mokumpyansa sa maong sakit ug pabiling sundon nato ang minimum health standards nga gipatuman sa gobierno.