Ni Elvira Bongosia, PIA
Nipasidaan sa publiko ang Department of the Interior and Local Government (DILG) kalabot sa bag-ong modus diin magpakaaron-ingnon nga Department of Health (DOH) contact tracers aron makapangilkil og kwarta.
Gipaalerto na ni DILG Kalihim Eduardo Año ang local government units (LGUs) ug Philippine National Police (PNP) batok sa maong mga pekeng contact tracers taliwala sa giatubang nga coronavirus disease 2019 (COVID-19) pandemic.
“Isa pang virus na kailangan pag-ingatan ng mga tao ang mga scammer na ito na sumasabay pa at nakukuhang manamantala ng kapwa ngayong krisis at ito ngang sa DOH ang pinaka-recent. I urge all LGUs and our men and women of the PNP immediately investigate these criminal activities,” matud pa sa pahayag ni Año.
Pagbutyag pa sa kalihim, ang mga nagpakaaron-ingnon nga DOH contact tracers kasagarang mobisita matag-panimalay ug sultihan ang biktima nga may nakalambigit nga COVID-19 positive. Human niini giingong mangayo sila og kwarta sa biktima ug ingnong bugti sa maong kwarta ang test kits nga gamiton.
“Inuulit ko po, hinding-hindi po hihingi ng pera ang mga contact tracing teams for their task is to track down and manage close contacts, reduce the spread of infection, and offer diagnostic counseling and treatment to confirmed COVID-19 cases. Yun lamang po,” pasabot pa ni Año.
Gidugang pa sa kalihim nga hinay-hinay nang nisaka ang gidaghanon sa mga nabiktima niining scam.
Dungan sa pasidaan, gi-awhag usab sa DILG ang publiko nga e-report sa otoridad ang mga pekeng contact tracers.
Matud pa sa kalihim, ang Contact Tracing Teams gipangunahan sa local government unit ug gidumala sa DILG. (ecb/PIA7-Bohol)