2 ka tuig nga moratorium sa bayranan sa loans gisugyot sa usa ka ‘hotelier’ 

Ni Rey Anthony H. Chiu, PIA

Duha ka tuig nga moratorium alang sa mga pahuwam, dili kay igo ra sa duha o tulo ka buwan, kini ma-oy sugyot sa usa  ka inila nga hotelier ug aktibo nga sakop sa industriya sa turismo sa Bohol.

Kini samtang nagkadaku ang utang sa mga negosyante sa trasportasyon sa turismo human napa-undang ang ilang serbisyo tungod sa nagpadayon nga pagsira sa Bohol sa mga turista nga gikan sa gawas.

Ang pagsira dala na usab sa local nga mga lakang sa pagseguro nga dili makasulod sa Bohol ang kagaw nga mananakod nga maoy nakapatikluhod sa mga higante nga ekonomiya sa kalibutan.

May daghan nga mga negosyante sa Bohol ang nangutang og mga brand-new nga sakyanan alang sa mga turista diha nga nakita nila nga nagkadaghan na gyud ang mga turista nga buot mosuroy sa Bohol.

Apan, sa wala pa mahuman ang mga bayranan sa mga pagpangutang, nabalda ang negosyo tungod sa hulga sa health ug public concern nga dala sa corona virus disease.

Subay sa Bayanihan to Heal As One Act, si Presidente Rodrigo Duterte mimandu sa mga ahensya  sa kagamhanan nga nagpautang sa pagpatuman sa duha  ka buwan nga moratorium sa mga balayranan aron usab makatabang sa mga apektado nga negosyo.

Apan, matud ni Rommel Gonzales, hotelier ug kasamtangan nga manager sa Modala Beach Resort Hotel nga pagkahuman sa duha ka buwan, mobayad pa gihapon ang mga utangan, bisan pa nga wala pay kita nga misulod sa ilang panudlanan.

“Mosamut kalubong sa utang,” matud pa ni Gonzales, kinsa usab nanguna sa paghatag og panalipod sa mga sakop sa industriya nga apektado sa pandemya.

 Matud niya, bisan pa human sa duha ka tuig, lisud pa nga mapaabut ang ingon ka lagsik kaniadto nga turismo, apan igo na tingali kini nga ang mga utangan, makasugod na usab og ginagmay nga negosyo ug makatigum na aron makasugod nga usab og pamayad.

 “Bisan duha ka tuig nga zero payment una, ug zero interest, igo na tingali kini aron makatabang sa mga nanginahanglan.”

Kini usab human gisugyot ni Gob Arthur Yap ngadto  ni Presidente Rodrigo Duterte nga hatagan og lugway ang mga nangutang aron magamit sa mga hingtungdan ang ilang importante nga kwarta alang sa mas importante nga galastuhan  sa panahon sa pandemya.

Hinuon, wala pa usab tubag gikan sa Presidente, kinsa may gahum nga momandu sa Bangko Sentral ng Pilipinas nga manduan ang mga institusyon sa pautang sa pagpugong una sa pagbayad sa mga bayranan. (rahc/PIA-7/Bohol)