Ni Elvira Bongosia, PIA
Subling nipasidaan ang LandBank of the Philippines (LBP) sa publiko kalabot sa nikatap nga mga pekeng Facebook accounts nga nagpailang mga opisyal ug empleyado sa maong bangko.
Matud pa sa gipagawas nga advisory sa Landbank, may mga FB accounts nga nag-awhag sa publiko nga magparehistro, magpatala, ug magpadala og salapi o load aron makadaog og premyo.
Giklaro sa Landbank nga wala sila’y ingon ani nga matang sa programa ug wala kini naggikan sa ilang bangko o sa bisan asang subsidiary niini.
Gi-awhag hinuon sa Landbank ang publiko nga likayan ang pag-apil sa maong Facebook pages o groups ug mag-amping sa paghatag og mga personal nilang detalye sama na lamang sa card number o CVV.
Matud pa nga ang mga impormasyon nga angay kuhaon didto lamang sa opisyal nga social media channels o website sa Landbank.
Gi-awhag usab sa Landbank ang publiko sa pag-report o ipahibalo kanila ang bisan unsang peke o bogus nga social media accounts sa bangko nga ilang makita. Mahimong motawag lamang sa Landbank Customer Care Hotline sa (02) 8-405-7000 o 1-800-10-405-7000 (PLDT Domestic Toll Free), o mag-email sa customercare@mail.landbank.com. (ecb/PIA7-Bohol)