By Rey Anthony H. Chiu, PIA
Aron dili mahinayak ang mga trabahante sa publiko ug pribado nga sektor og palit sa gipangayo nga personal nga panalipud, diay kasayuran: dili mahimo ang face shield nga igo lamang motabon sa mata, alang sa occupational safety and health.
Kini maoy nabutyag sa Department of Trade and Industry ug sa Department of Labor and Employment didto sa ilang labing bag-o nga Supplemental Guidelines on Workplace Prevention and Control of COVID-19 nga ipatuman alang sa tanang lugar trabaho-an, sa mga employer ug mga trabahante, ilabi na sa pribado nga sektor.
Matud sa naghiusa nga mga ahensya, ang minimum standards sa public health nga sundon sulod sa mga trabahoan naglangkob sa face shileds nga magatabon gayud sa tibuok dagway, apil ang mga kilid sa nawong lakip na ang suwang.
Dason sa guidelines, ang paggamit sa visor type face shields wala itugot.
Gani, ang face shields ug ang face masks kanunay gayud nga kuyogon og sul-ob ilabi na kon makig-atubang sa mga katrabaho, kliyente ug mga bisita sa trabaho-an.
Hinuon, kon gikinahanglan sa linya sa trabaho, mahimo nga tangtangon ang face shield ilabi na kon kini makasagabal sa pagbuhat sa trabaho, sama pananglit sa mga welder.
Sa paggamit usab sa face masks, kon ang gigamit ang yano nga panapton o noog nga facemasks, kinahanglan nga aduna kini gisup-it nga filter, sama sa tissue paper o semi-absorbent nga babag.
Kini nga filters, kinahanglan nga matangtang usab kay kinahanglan kining filter pulihan matag human og ubo ug pangatsi, ug labhan na dayun human sa usa ka adlaw nga gamit.
Sa pagpuli sa mga filter, kinahanglang nga manghunaw una, ug manghunaw usab gihapon human sa pagtaud sa bag-ong filter, subay sa guidelines.
Gidid-an usab ang kanunay nga paghikap aron tarungon ang face masks, ug kadtong mga disposable nga face masks kinahanglang dili na gamiton pag-usab, ilabay na sa mga tumbok nga basurahan aron dili masagol sa kasagran nga basura gikan sa buhatan.
Samtang gilagda ang kanunay gayud nga pagsul-ob sa mga face masks, gisugyot nga ang gamiton sa mga buhatan, kadtong medical grade nga face masks sama sa N88 ug N95.
Ang mga face masks nga adunay vents o lustanan sa hangin (airvents), gidili usab nga gamiton sa mga trabaho-an.
Gawas sa paggamit sa face masks ug face shields, pugos pa gihapon ang pagpatuman sa social ug physical distancing sa mga trabahante sa mga trabaho-an, samtang ipahimutang gihapon ang mga disinfection stations ug handwashing nooks nga magamit sa tanan. (rahc/PIA-7/Bohol)