Ni Rey Anthony H. Chiu, PIA
Gipailawom sa kwarantina ang mga servidora ug mga tigluto sa labing menos walo ka kan-anan nga anaa sa kilid sa Gov. Celestino Gallares Memorial Hospital (GCGMH) human nasayran nga may usa ka bantay sa pasyente sa nahisgutan nga tambalanan nga nagpositibo sa Corona virus disease ug didto magkan-anan sulod sa duha ka adlaw.
Sa usa ka post sa Facebook niadtong Sabado sa buntag, Agosto 22, gibutyag ni City Mayor John Geesnell Yap II nga iya nga temporaryo nga gipasira dayun ang unom ka kan-anan ug duha ka tindahan sa nahisgutan nga lugar samtang gipa-ilawom sa kwarantina ug giagi sa Reverse Transcription Polymerase Chain Reaction (RT-PCR) ) ang mga nahitungdan sa ikalima nila ka adlaw sa kwarantina.
Sa saysay sa batan-ong mayor sa Tagbilaran, matud niya sa iyang pahibalo ngadto sa tanan nga naay gikan sa laing lungsod (wala magpakita og timailhan sa sakit) kuyog sa na admit sa Gallares hospital ang nag positive pod sa PCR test. Naka kaon ni siya sa mga carenderias pag August 19 og 20 dapit sa Gallares Hospital.
Kini usab nga saysay matud pa sa usa ka tinubdan nga mismo usa ka opisyal sa GCGMH nga nag-awhag sa paglikay sa pagduol sa mga lugar dapit sa tambalanan tungod kay dihay nagpositibo sa COVID nga nagsuroysuroy tibuok adlaw nga wala masayud nga positibo na diay siya sa sakit.
Matud pa, nahibaw-an lamang kini sa mga tinugyanan sa tambalanan niadto nang Agosto 21 sa palis.
Aghat sa nahisgutan nga tinubdan nga ipahibaw kini aron makontrolar ang pagkatag sa sakit kon ugaling aduna man.
Ang nahisgutan nga bantay sa pasyente, hinuon kasamtangan na nga nakakwarantina, apan nahingawa ang mga tinugyanan sa duha ka adlaw nga didto siya magkan-anan sa mga carinderia kilid sa nahisgutang tambalanan ug atbang sa usa ka pribadong lumber supply.
Gani, dugang ni Mayor Yap nga ang nahisgutan nga bantay, padung na usab mo sulod sa usa ka mall, apan maayo nalang kay wala pa kini mangabli.
Ang mga carinderia nga gipasirad-an sa mayor tungod kay posible nga didto magkan-anan ang bantay nga nagpositibo mao ang Rio Store, Añuver Store, Guiritan Store, B and Boy Store, Kan-anan Eatery, Star Jane Eatery, Rodj Eatery, ug Abad Eatery.
Una na nga gipasira sa mayor ang unom ka mga carinderia, ug gidugang na ang lain nga duha pa ka tindahan sa iyang gibag-o nga post niadtong Sabado.
Dugang nga panawagan sa mayor ngadto sa tanan nga mikaon sa nahisgutang mga carideria niadtong Miyerkoles ug Huwebes sa pagtawag dayun sa numero 09616189368 ug 09959500381 alang sa pasiuna nga mga interview ug possible nga pagpahi-apil nila sa contact tracing activity sa mga tinugyanan sa kasanihan sa syudad. (rahc/PIA-7/Bohol)