Dili makadaot ug walay dautan nga epekto ang gun-thermal scanner sa tawo. Mao kini ang pamahayag, sa Department of Health (DOH).
Kining maong pamahayag, migawas taliwala sa mga gipakatap nga sayop nga pangagpas sa pag gamit sa thermal scanner kung kini ipadu-ol sa agtang sa tawo aron makuha ang iyang temperatura aron pagmatuod kung aduna ba siya’y hilanat o wala.
Matud pa sa mga gipakatap na mga estorya lakip na ang anaa sa social media, aduna kuno’y usa ka doktor nga wala hinganli nga naga-ingon nga ang pag gamit sa thermal gun sa duol sa agtang sa usa ka tawo makadaut sa pituitary gland sa maong tawo.
Wala usab hisguti didto kung unsang paagiha ug ngano nga makadaut ang maong thermal scanner sa pituitary gland sa tawo.
Gikan sa kasayuran sa maong gipakatap nga balita kansang tinubdan mao ang wala hinganli nga doktor, misunod dayun ang kahingawa sa pipila ka hut-ong sa katilingban kabahin sa kadaut nga mahi-aguman sa mga tawo nga mugamit sa thermal scanner haduol sa ilang agtang.
Ang dagway sa pineal glands, susama sa pituitary glands. Ang ilang gidak-on susama sa usa ka lusok sa mais. Anaa kini mahimutang sa tungatunga ug sa luyo nga bahin sa utok sa tawo, ug mao kini ang mga glands nga nagakontrolar sa pagpadagan sa mga hormonal glands sa tawo.
Mipadayag ang DOH nga walay dautan nga epekto ang thermal scanner sa utok sa tawo, ug kini usa ka luwas nga pamaagi sa pagkuha sa temperatura sa maong tawo.
Kung ang utok sa tawo nga usa sa labing sensitibo nga bahin sa iyang lawas nga anaa mahimutang sa ulo dili ma-apektuhan sa thermal scanner, unsa pa kaha kanang anaa nahimutang sa ilawom ug tungatunga nga bahin sa utok?
Sayop kini nga impormasyon matud pa sa DOH. Ang usa sa mga gikahadlokan sa mga nakabasa sa sayup nga kasayuran kanang pula nga suga nga mosiga kung ang thermal scanner ipaduol na sa agtang sa tawo.
Matud sa mga eksperto, ang pula nga mosiga sa thermal scanner, usa ka infrared nga suga, ug kini dili makadaut, bisan pa kon madaklitan og kaigo ang mata.
Ang sistema sa infra-red scanner, mao ang pagdawat sa nag-gawas nga kainit sa lawas sa tawo (thermal radiation) ug dili ang suga sa infrared scanner maoy mosukod sa kainit. Tungod niini, ang paggamit sa infrared thermometers dili makadaut sa mata ug bisan gani sa lawas sa tawo.
Ang lawas sa tawo magpa-alisngaw sa ka-init pinaagi sa energy nga makita niining thermal scanner, dugang nga saysay sa eksperto.
Midugang sa pagdason ang DOH nga ang thermal scanner maoy labing sayon nga paagi sa pag-ila kon ang usa ka tawo adunay hilanat. Sa atong nasayran, ang hilanat usa sa mga timailhan nga adunay impeksyon sa lawas nga mahimong dala sa coronavirus disease.
Tungod niini, adunay sugyot ang DOH nga ipadayon ang pag gamit sa thermal scanner aron pagkuha sa temperatura sa tawo. (PIA)