Sinulat ni Elvira Bongosia
May kinatibuk-ang 797 ka mga bag-ong contact tracers ang gipakatap karon sa nagkalain-laing lungsod ug sa syudad sa Tagbilaran sa tinguhang mokusog ang contract tracing program sa lalawigan aron mapugngan ang pagdaghan sa matakdan sa coronavirus disease (COVID-19).
Ang mga bag-ong contact tracers nga gikan sa Department of Interior and Local Government (DILG) misugod sa ilang trabaho niadtong miaging Huwebes, Oktubre 1.
Mipahigayon ug usa ka courtesy call ang mga bag-ong nakuhang contact tracers ngadto sa mga mayor sa lungsod diin sila ibutang, matud pa ni DILG Provincial Director Jerome Gonzales.
Niadtong Biyernes, Oktubre 2, ang DILG mihimo sa usa ka kalihukan nga gitawag ug virtual mass orientation pinaagi sa online gathering sa tanang contact tracers sa Central Visayas.
Ang Municipal Local Government Operations Officers (MLGOO) mupahigayon usab ug lain nga orientation sa mga bag-ong nadawat nga mga kauban ang mga pundok sa kasamtangang contact-tracers gikan sa mga lungsod.
Ang 797 ka mga bag-ong nadawat nga mga contact tracers apil sa gilaraw nga 996 ka contract tracers nga pagadawaton sa DILG alang sa lalawigan sa Bohol.
Miingon si Gonzales nga ang mga contact tracers mangalagad isip mga contract of service personnel sulod sa upat ka buwan ug magadawat sa binuwan nga suhulan nga mukabat ngadto sa P18,784 nga nahasulod sa Salary Grade 9.
Lakip sa mga katungdanan sa mga contact tracers mao ang: pagpahigayon sa mga interbyu, profiling, papahigayon ug inisyal nga public health risk assessment sa mga kaso sa COVID-19 lakip na ang ilang mga close contacts, pagduso sa maong mga close contacts ngadto sa isolation facilities, pagpahigayon sa enhanced contact tracing, pakig-alayon sa uban pang mga ahensya ug pribadong sektor; pagpahigayon ug inadlaw-adlaw nga pagsubay sa close ug general contacts nga dili mo-ubos sa 14 ka adlaw; ug pag pahigayon sa uban pang mga himuonon nga may kalabotan sa COVID-19 response. (PIA)