Gitakdang sugdan na sa Philippine Statistics Authority (PSA) ang mass registration alang sa National ID System karong umaabot Oktubre 12, 2020 kun ugmang adlawa.
Kini human wala madayon ang mass registration nga gikatakdang himuon niadtong Hulyo. Wala madayon ang mass registration sa Hulyo tungod sa coronavirus disease 2019 (COVID-19) pandemic.
Sa usa ka pahayag ni PSA Asec. Rosalinda Bautista, miingon siya nga prayoridad nila sa registration ang 5 milyon nga low-income households gikan sa listahan sa Department of Social Welfare and Development (DSWD).
Matud pa ni Baustista, muadto sa mga kabalayan ang mga PSA personnel aron kuhaon ang impormasyon sa mga pre-registrants.
Gikataho nga sa ingon niining paagiha, mapadali ang proseso tungod kay dili na kinahanglan pang maghulat ug dugay ang mga pre-registrants kun moadto pa sila sa mga registration centers sa Nobyembre 25 alang usab sa ilang biometric capture.
Gitumbok ni Bautista nga dugang 4 milyon ka mga tawo pa ang pagahatagan sa ilang iskedyul sa registration.
Sa sunod tuig, aduna silay target nga ipatala ang 45 ka milyon ka mga tawo ug dugang 42 milyon pa sa 2022.
Miingon si Bautista nga paghuman sa pangatungdanan ni Presidente Duterte, gikatakda nga marehistro na ang kadaghanan sa mga lumulopyo sa Pilipinas.
Giklaro usab sa opisyal sa PSA nga libre ang registration ug ang ID nga ipanghatag. (Elvira Bongosia)