Nanawagan ang Department of Education (DepEd) sa mga ginikanan nga dili sila (mga ginikanan) ang mohimo sa pagtubag sa work sheets sa mga tinun-an tungod kay ang ilang katungdanan mao ang pag giya sa ilang mga anak. .
Sa gipahigayong online media forum usa ka adlaw sa wala pa magsugod ang mga klase sa mga pampublikong tunghaan, miingon si DepEd Undersecretary Tonisito Umali nga mahinungdanon ang papel nga pagadalhon sa mga ginikanan sa bag-ong set-up sa pagtuon. Apan wala kini magpasabot nga ilang pagaakuhon ang buluhaton sa mga kabata-an sa tulunghaan.
“Hindi po sila ang dapat sasagot ng pagsusulit o takdang aralin o gawaing pang-upuan ng mga bata. Klaro po ‘yan,” matud pa ni Umali.
Gidugang pa ni Umali sa pagsulti nga adunay gipahigayong panagtigum ang mga ginikanan aron pagsuta kung unsaon pag giya sa mga kabata-an aron kini sila makakat-on sa ilang mga buluhaton sa tulunghaan. .
Giingon nga adunay paagi usab ang mga eskwelahan aron mahibaw-an kung nasabtan ba sa mga estudyante o wala ang mga leksyon.
Si Umali nagkanayon nga ang mahinungdanon mao nga siguradohon gyud sa mga ginikanan nga pinaagi sa ilang pag giya sa mga tinun-an, makakt-on ang ilang mga anak sa mga leksyon.
Gipahibaw usab ang kadaghanan nga tungod sa padayon nga hulga sa coronavirus disease (COVID-19), ipadayon sa mga tulunghaan ang pagpatuman sa distane learning diin makat-on ang mga bata gikan sa ilang mga panimalay pinaagi sa modules, online classes, telebisyon ug radyo. (Elvira Bongosia/PIA)