Pagsuot ug ‘face shield’ sulod sa merkado sa Tagbilaran magsugod sa Sept. 1 

Ni Elvira Bongosia,PIA

Ang lokal nga kagamhanan sa syudad sa Tagbilaran magsugod na sa estriktong pagpatuman sa pagpasuot og face shields sa tanang mosulod sa merkado sa syudad sugod sunod semana.

Si Mayor John Geesnell Yap II nipahibalo niadtong Lunes nga ang syudad mopatuman na niining bag-ong lakang nga gitumong aron makunhoran ang pagkuyanap sa makatakod nga coronavirus disease 2019 (COVID-19) sugod sa Setyembre 1, 2020.

“Sugod sa September 1, tanan mo sulod sa mga public markets gi-require na og face shiled ug face mask. Naka hibaw ko nga hassle ni pero para ra ni sa atong kaayohan, og kaayohan sa uban taw,” matud pa sa pahayag ni Yap.

Ang face shields isuot ibabaw sa face mask nga gimandato nang isuot kun mogawas sa panimalay.

Giangkon sa mayor nga ang pagsuot sa personal protective equipment dili sayon alang sa uban apan gituyo kini alang sa public health safety taliwala sa pandemya.

Ang lokal nga kagamhanan sa syudad sa Tagbilaran una nang nipatuman sa pagpasuot og face shields sa mga pampublikong sakyanan.

Samtang ang Department of Labor and Employment (DOLE) una nang nimando sa mga empleyado sa pagsuot og face shields sa ilang pagtrabaho. (ecb/PIA7-Bohol)