1st Congressional Library’ sa Bohol himuong modelong library sa tibuok nasod 

Ni Elvira Bongosia,

Ang House Committee on Education nga gipangunahan sa Chairman niini nga si Cong. Roman Romulo miila sa First District Congressional Library sa Balilihan, Bohol BOT Balilihan Congressional Library isip modelong library nga angayang itukod sa tanang Congressional Districts sa tibuok nasod.

Kini human ang komite bag-o lang mi-aprobar sa House Bill No. 2666 nga gisang-at sa Bol-anong magbabalod nga si Cong. Edgar Chatto sa paghimo sa library nga ‘fully national’ ug paglakip niini sa National Library of the Philippines (NLP) nga adunay alokasyon nga pondo sa General Appropriations Act (GAA) alang sa operasyon ug personnel niini.

Ang NLP usab ang mohatag sa mga libro, reading materials ug uban pang mga kagamitan.

Sa gipahigayong virtual awarding ceremonies niadtong Agosto 25, ang NLP ug The Asia Foundation (TAF) miila sa Balilihan Congressional Library isip Top Performing Congressional Library sa 2019.

Ang maong library giila sa ‘extensive library services,’ niini nga naglakip sa serbisyo alang sa mga bata, persons with disability (PWD), senior citizen, out of school youth ug Community Outreach, Tech4ed Center, Digital Computer Literacy Reference, Storytelling session, ug Online References.

Ang Balilihan Congressional Library namugna pinaagi sa inisyatiba ni Chatto niadtong tuig 2008 aron paghatag og akses sa de-kalidad nga serbisyo sa library sa mga ‘underserved areas.’ 

Gitukod kini tapad sa Bohol Island State University-Balilihan Campus sa paningkamot usab ni Chatto niadtong tuig 2009 pinaagi sa Republic Act 9722 isip ika-6 nga campus sa unibersidad.

Ang maong library nagserbisyo karon sa dul-an kwarenta mil ka mga kliyente. (ecb/PIA7-Bohol)