Ni Elvira Bongosia, PIA
Nipasidaan ang Bureau of Immigration (BI) sa publiko kalabot sa pagbalik sa operasyon sa mga sindikato sa “human trafficking.”
Kini human gitaho sa mga BI officers sa Ninoy Aquino International Airport (NAIA) nga napugngan nila nga makagawas sa nasod ang duha ka Pinay nga gituhoang biktima sa maong ilegal nga buhat sa mga sindikato.
“We warn our kababayans not to fall prey to the nefarious activities of these syndicates who do not feel any remorse in preying on their poor countrymen amidst the continuing COVID-19 pandemic,” (Atong gipasidan-an ang atong mga kaigsoonan nga dili magpadala sa mga tam-is nga haylo sa mga sindikatong dala gyu’y bisag dyutay nga kaikog nga mamiktima sa atong mga kabus nga kaigsoonan bisan pa niining pandemya karon), pasidaan ni BI Commissioner Jaime Morente.
Tungod niini, gimanduan ni Morente ang tanang BI Officers sa maong tugpahanan nga doblehon ang ilang pagbantay ug pugngan ang paglarga sa mga pasahero nga kadudahan o posibleng mahimong biktima sa human trafficking ug illegal recruitment.
Gipahayag ni Morente ang iyang pasidaan human nababagan sa mga BI officers sa NAIA ang duha ka Pinay nga pasahero nga padulong unta sa United Arab Emirates (UAE) human magpakita kini og mga pekeng travel documents.
Giingong padung na unta mosakay ang duha ka Pinay sa Philippine Airlines padulong sa Dubai niadtong Setyembre 1 sa dihang gibabagan sila sa mga Immigration officers sa departure area sa NAIA Terminal 1.
Matud pa nga gitugyan na sa BI ang duha ka Pinay ngadto sa Inter-Agency Council Against Trafficking (IACAT) NAIA Task Force alang sa dugang imbestigasyon. (ecb/PIA7-Bohol)