Ni Rey Anthony H. Chiu, PIA
Nagpasalamaton ang lokal nga kagamhanan sa Bien Unido pinaagi nila ni Mayor Renee Borenaga ug Bise Mayor Ramon Arcenal sa pagdagsang sa tabang ug kooperasyon sa ilang mga katawhan sa gipasunod nga mga palisiya aron dili makakatag pa sa daghan ang coronavirus nga gikamatay sa usa nila ka molupyo.
Kahinumduman nga gimandu sa mga lokal nga kagamhanan ang total nga pagtrangka sa isla sa Malingin human sa kaso nga may namatay ug diin 22 ka tawo sa isla ang nakaduol sa namatay.
Ang Malingin, usa ka isla nga 45 minutos pinaagi sa pumpboat gikan sa mainland sa Bien Unido diin, matud pa ni Kapitan Arnie Nellas, may kinatibuk-ang populasyon nga dul-an na sa 2000.
Niadtong Septembre 3 sa may alas 4:00 sa hapon, gikataho na nga ang 22 ka tawo nga nalakbitan sa contact tracing, nagnegatibo na sa corona virus disease (COVID).
Kasamtangan nga gipaagi na usab sa Reverse Transcription real time Polymerase Chain Reaction test ang swab samples sa nahibilin nga active case sa Nueva Estrella ug Malingin ug, segun pa sa labing uwahi nga taho, kon magnegatibo na, ma zero cases na ang lungsod, segun pa ni Manuelito Item, information officer sa lungsod.
Kining maayong balita, nakapalubong na ngani sa mga lokal nga inisyatiba nga gibuhat sa mga kahugpungan ug indibidwal nga milihok alang sa buhat sa kalooy sa mga taga isla nga dili na makagawas dala sa lockdown.
Kahinumdoman nga usa ka kagawad sa Barangay sa silingang isla sa Hingotanan West, Michael Kano Hoybea, personal nga mitunol sa iyang hinabang nga cash nagkantidad ug P6,374, gikan sa iyang honorarium, ngadto ni Mayor Borenaga, alang sa barangay Malingin.
Sa mga personal usab nga naghatag sa hinabang alang sa isla, mihangyo si Kapitan Nellas sa Malingin, nga kini nga tabang ipalit nalang ug gatas.
Sa paningkamot usab sa mga pribado nga tawo nga nagkugi og solicit ug sa abag ni Adorna Malicay, miabut na sa ika upat nga hugna ang tabang alang sa mga face shileds ug pinakete nga noodles alang sa isla.
Sa kalisud usab sa sugnod ug walay taga mainland nga makadunggo sa isla kon walay otoridad, ang Catholic Family and Life Apostolate sa parokya sa Bien Unido, mipadala og 256 ka food packs ug 700 ka bugkos nga kahoy igsusugnod isip ayuda sa barangay Malingin.
Wala usab magpauwahi ang LGU Bien Unido, gawas sa naghatagan sa pagkaon sa isla gamit ang kaugalingon nga sakyanan sa lungsod, sila ang nagpadala sa 23 ka gallon nga pamatay-kagaw nga gihatag ni Board Member Mimi Boniel, kini alang sa frontliners ug sa mga quarantine facilities sa lungsod ug sa isla.
Gikan sa pikas nga bahin sa Bohol, pinaagi sa DyRD Bohol Chronicle, sa proyekto nga tabang Isla, naghatag didto og 401 pa sudlanan sa tubig, 260 ka Face Shields, 81 ka kahon sa Face Masks, 8 ka kahon sa Alcohol ug 3 ka kahon sa sabon alang sa barangay Malingin.
Sa ngalan sa Local Government Unit of Bien Unido, ako ug si Bise Mayor uban sa SB Members, magpadangat sa among daku nga pasalamat sa tanan nga mitunol sa ilang hinabang alang sa lungsod ug sa isla. Unta, magnegatibo na ang atong duha ka kaso aron mahiluna na usab kita, dayag ni Mayor Borenaga. (rahc/PIA-7/Bohol)