Ni Rey Anthony H. Chiu, PIA
Sa walo ka Bol-anon nga namatay sa coronavirus disease, 7 niini lapas sa 43 anyos, segun pa sa taho sa mga tinugyanan sa kasanihan sa Bohol.
Nunot niini, subli nga gipanawagan sa mga tinugyanan sa kasanihan ug mga opisyales sa Bohol ang tinabangay ug pagtamud sa matag usa sa mga mandatus sa paglikay sa paggawas-gawas una, pagsul-ob og mask kon di kapugngan nga mogawas, paggamit sa face shield kon makig-atubang og tawo, pagbatasan sa pagpanghunaw ug paglikay sa paghikap sa mask o sa bisan hain mang bahin sa dagway.
Kini maoy unod sa taho nga gipadayag sa Kapitolyo kang kinsa nga Inter-Agency task Force on the Management of Emerging Infectious Disease Medical Cluster nagtutok sa medical nga aspeto niiining pandemya nga gisagubang sa mga Bol-anon.
Sa mga nangamatay, ang labing taas og edad, ang sa 89 anyos, ug ang labing ubos sa mga hingkod nga namatay, 43 anyos nga lalaki.
Lima ka lalaki nga nasakit sa COVID ang namatay samtang tulo ang babaye, subay sa taho.
Niadtong September 7, mikabat na sa 190 ka Bol-anon nga nasakit sa COVID ang nakarekober na, samtang mitala pa gihapon ang 50 ka aktibong kaso sa COVID.
Lakip na usab sa mga labing maayong balita niining semanaha ang pagka-ayo sa 22 ka mga nagpositibo sa COVID-19 sa Bien Unido, diin didto sa isla sa Malingin, nakasugod og panghasi ang kagaw nga gikamatay na sa us aka taga didto.
Kini bisan pa sa pagdawat sa Bohol sa mga Overseas Filipino Workers, mga Locally Stranded Individuals, ug mga Authorized Persons Outside Residence (APOR) nga gidudahan nga mahimong maoy makadala sa kagaw dinhi.
Segun sa taho sa Kapitolyo, kasamtangan na nga 4,436 sa kinatibuk-an nga 5,270 ka mga OFWs ang nahuman na sa pugos nga kwarantina sa 14 ka adlaw samtang may nagpadayon pa nga 834 ka mga OFWs nga karon naa pas a mga isolation facilities.
Sukad sa marso 23, 2020 diha nga nanawat na ang Bohol sa mga LSI, mikabat na sa 18,538 ang mga Bol-anon nga nakauli na sa yutang natawhan, 14,708 ang nakahuman na sa 14 ka adlaw nga paglaming ug 3761 pa ang nagpadayon sa ilang mga kwarantina.
Dugang sa taho sa Kapitolyo, may kasamtangan pa nga 6,885 ka mga LSI nga umaabut pa ug maghuwat na lang kon kanus-a mabakante ang mga isolation facilities sa ilang mga tagsa tagsa ka lungsod nga uli-an. (rahc/PIA-7/Bohol)