Usa ka magti-ayon ang gipusil sa mga gikatahapan didto sa Jagna, Bohol niadtong Sept.15, 2020.
Ang magti-ayong nga biktima nailhan nga sila si Jeorge Acebu, 52 anyos, minyo, ug si Josie Acebo 58 anyos, minyo ug mga molupyo sa Purok 6, barangay Balili, Jagna, Bohol.
Sa pakisusi nga gihimo sa The Bohol Tribuna, nasayran nga ang pagpamusil nahitabo sa may mga alas 7 ang takna sa kagabhion didto mismo sa panimalay sa magtiayon diin ilang gisaysay nga dihay duha ka wala mailheng gikatahapan nga miadto kanila ug gilayon miusil kanila. Gihulagway ang mga gikatahapan nga mubo ang barog, nagsul-ob sa facemask, itom nga tshirt ug nagtabon pa gayud ug itom nga tshirt sa ulo.
Misaysay pagdugang ang magti-ayon ug miingon nga sila nanihapon didto sa ilang kusina sa dihang dunay nitoktok sa ilang pultahan sa balay. Sa dihang gibuksan sa bana ang ganhaan, gilayon kini siya nga gipusil sa makaduha nga maoy nakaigo kaniya sa tuong bahin sa gusok. Naigo usab ang iyang kapikas sa stray bullet didto sa tuong bahin sa ulo ug walang bahin sa kamot.
Human sa pagpamusil, dali nga misibat ang mga wala mailhing gikatahapan palayo sa maong dapit samtang gidala gilayon ang magtiayon didto sa Teodoro Galagar District Hospital sa Jagna alang sa dugang nga pag-atiman.
Pagka karon, gihimuan na sa dugang nga pakisusi ang maong hitabo ug gihatagan ug makuti nga imbestigasyon sa mga sakop sa Jagna Municipal Police Station alang sa pag ila sa mga namusil lakip na ang motibo sa maong pagpamusil. (Dave Charles Responte)