Kusganong gipanghimakak ni Loboc Mayor Leon Calipusan ang migawas nga taho nga siya ang tag-iya sa usa ka ‘quarry site’ nga gipasirado tungod sa mga ge-alegar na kalapasan.
Ang naasoy nga quarry site nahimutang sa Brgy. Upper Bon-bon didto sa lungsod sa Loboc.
Gibutyag ni Calipusan nga sayop ang mga balita nga migawas, sanglit ang nanag-iya sa ‘quarry site’ mao man ang lokal nga pangagamhanan sa Loboc.
Migawas usab gikan sa mga tinubdan sa Kapitolyo nga si Calipusan ang tag-iya sa quarry site nga gipasirhan sa Bohol Environmental Protection Task Force (BEPTF). Gipasirhan kini, matud pa sa mga tinubdan sa balita, tungod sa ge-alegar nga kalapasan sa Article 2, Section 3 sa Provincial Ordinance 2008-025 o Bohol Small-Scale Mining Ordinance.
Mipagawas ang closure order sa BEPTF ubos ni Provincial Legal Officer Nilo Ahat ug gipatuman sa task force team nga gipangulohan ni Col. Alex Maglajos.
Si Calipusan mitug-an nga adunay permit ang quarry sa local government unit (LGU) ug kini pinirmahan sa kanhi administrasyon apan dili pa nila ma pakita ang maong kopya tungod kay nadaot kini sa dihang mi-igo ang bagyong Seniang niadtong Disyembre 2014.
Sa pagkakaron matud ni Calipusan naningkamot sila nga makakuha ug permit aron mapadayon usab ang mga proyekto sa kabarangayan diin ang mga materyales nga gigamit gikan sa maong quarry site.