Sinuwat ni Rey Anthony Chiu
Adto paingon sa mga pahuwam sa mga sector nga labing na-igo sa pandemya sama sa gagmay nga mamumuhunan, mga naa sa sector sa panakyanan, turismo ug agrikultura ang labing dako nga pahat gikan sa P165 bilyones nga Bayanihan To Recover As One II (Bayanihan 2) nga gipirmahan ug nahimo na nga balaod niadtong Biyernes.
Dugay na nga giaghat nga ipalusot na, ang bag-ong balaod nga magtugot ni Presidente Rodrigo Duterte sa pag-gamit sa mga pundo nga una na nga gitagana sa mga galastohan sa mga ahensya sa tumong nga mas mapamaayo pa ang pagtubag sa Pilipinas sa pagkuyanap sa corona virus disease (COVID-19).
Gawas sa mga gagmay nga mamumuhunan, ang Bayanihan 2 magpahat usab sa mga allowance sa mga estudyante sa pribado ug pangpublikong tunghaan gikan sa elementarya ngadto sa kolehiyo, basta lang apektado ang ilang mga banay sa pag-undang sa mga trabaho tungod sa pagpatuman sa mga kwarantina ug lockdowns.
Dugang pa, gastohan niini sa kagamhanan ang health-related responses, lakip na ang pagbayad sa na-utang nga P100,000 hazard pay sa mga health workers; ang pagpanawat sa dugang dinali-ang nga mga health workers; ug ang risk allowance sa mga health workers sa pribado ug pangpubliko nga sector nga nag-amuma sa mga pasyente sa COViD-19.
Kahinumduman nga gilagdaan usab sa Presidente ang Bayanihan I alang sa hiniusa nga pagpa-alim samtang ang Bayanihan 2 alang sa hiniusang pagpahiuli.
Gilagdaan sa Presidente ang Bayanihan 2 niadtong Septembre 12 isip kabahin sa paningkamot sa kagamhanan sa hinay-hinay nga pagpabukas og balik sa ekonomiya, pagsuporta sa mga negosyo ug sa pag-atiman sa kaugmaran taliwala sa Covid-19 pandemic, segun pa ni Malacanang spokesman Harry Roque Jr.
Gipalusot na sa Senado ug Kongreso ang balaodnon nga nagpahat sa P140 ka bilyon isip regular nga pahat ug laing nga 25.5 bilyones isip dugang pundo kon mahurot na ang gipahat.
Kahinumduman usab nga una na nga gitaho sa Department of Health nga P53.48 bilyones sa 140 bilyones nga kinatibuk-ang regular nga pahat ug laing 25.5 bilyones nga standby fund sa Bayanihan 2 ang gitagana isip suporta sa health care workers (HCW), aron makalahutay ang kampanya sa departamento samtang makapanalipod sa mga HCW ug pugngan ang pagdagsang sa mga nasakit.
Kon ang Bayanihan to Heal As One Act, o Bayanihan 1, nagtanyag sa mga medical frontliners sa personal protective equipment, katulganan ug risk allowance, ang Bayanihan 2 magtutok sa nahauna nga pag-atiman sa katawhan ug pag-ugmad sa sistema sa health care. (rahchiu/PIA-7/Bohol)