Sinuwat ni Rey Anthony Chiu
Sa pagsalig sa bag-o nga accreditation sa Department of Health sa bag-o nga Reverse Transcription Polymerase Chain Reaction (RT-PCR) testing machine sa Gov. Celestino Gallares Memorial Hospital, giduso na ug gani, gipatuman na sa Bohol ang binag-o nga pamaagi sa pagtesting sa mga tawo kon may corona-virus disease o wala, ug ang pagpakwarantina.
Segun sa Memorandum No. 41, series of 2020 ni Gobernador Arthur Yap, gipamub-an na ang panahon nga gikinahanglang ipailawom sa kwarantina sa tanang tawo nga mosulod sa Bohol, kinsa makapakita sa negatibo nga resulta sa timailhan sa kagaw nga mananakod human sa ika lima ka adlaw sa pugos ug binantayan nga pagkwarantina.
Sa Memorandum nga gilagdaan sa gobernador niadtong Agosto 4, 2020, gipadayag ni Gob Yap nga tungod sa operational nga RT PCR machines, mahimo na sa Bohol nga maghimo sa mga kausaban sa mga protocols sa pagtesting ug sa pagpakwarantina.
Matud sa goberandor, ang tanan nga returning Overseas Filipinos (ROFs), Locally Stranded Individuals (LSI) Authorized Persons Outside Residence (APOR) ug bisan kinsa nga mobisita sa Bohol, mopailawon na sa RT-PCR testing sa ilang ika lima ka adlaw nga kwarantina.
Kon sa resulta sa testing, negatibo sila sa ug wala silay gipakita nga mga simtomas sa katas-on sa lima ka adlaw nga kwarantina, mahimo na nga putlon na ang ilang pagka-kwarantina.
Segun pa sa gobernador, tuyo sap ag-usab sa mga protocols, aron masuwayan ang kapasidad sa Bohol sa pagsagop sa bag-ong mga normal nga pama-agi sa pagbyahe, pagsulod ug pag-gawas sa Bohol, u gang pagpabukas na og balik sa industriya sa turismo subay sa konsepto nga Travel Bubble.
Sa Travel Bubble, giingon nga mahimo nga may makasulod sa Bohol basta gikan sa mga lugar nga may susama og kahimtang sa lalawigan ug hugot nga gibantayan ang ilang pagtabok, nga wala gyuy lain silang makaduol, susama nga mahimo kon ang mga Bol-anon mobyahe paingon sa lugar nga gikasabut sa Bohol nga magbayloay sa mga tawo.
Adunay panginahanglan nga timbang-timbangon ang pagpabukas og balik sa local nga ekonomiya ug patigayon, ilabi na kadtong naglambigit sa eco-tourism, ug ang kasanihan ug luwas nga Bol-anon nga maoy labing una nga tuyo ug tumong niining konsiderasyona, saysay sa gobernador sa Memorandum.
Misalig siya nga pinaagi lamang niini, kasuwayan ang bag-ong paagi, ang epektibo nga pag contact trace ug ang pagpatuman sa health ug safety standards ug protocols. (rahchiu/PIA-7/Bohol)