Mipasidaan ang Food and Drugs Administration (FDA) sa mga motorista kalabot sa kakuyaw sa pagtago ug paghupot ug mga botelya nga dunay sulod nga alkohol sa ilang mga sakyanan.
Gipadangat kinin maong taho human nahimong ‘viral’ sa social media ang pagbuto sa botelya sa alkohol nga gibilin sa sakyanan nga maoy hinungdan sa pagkaguba sa salamin, sulod ug interior nga bahin niini lakip na ang lingkuranan.
Sa usa ka pamahayag, miingon si FDA Director General Eric Domingo nga ang tanang matang sa alkohol mahimong mosilaob ilabi na kung ibutang kini sa saradong lugar sama sa mga sakyanan.
Matud pa ni Domingo nga angay nga siguraduhong hugot ang pagkasarado sa botelya sa alkohol ug ibutang sa usa ka lugar nga ang temperatura dili molapas sa 30 °C.
Kahinumdoman nga sukad nagsugod ang pandemya, daghan sa mga katawhan ang nagtipig og alkohol tungod kay usa man kini sa nag-unang pangbatok sa coronavirus disease 2019 (COVID-19).
Apan daghan usab sa mga motorista ang makalimot sa pagkuha niini sulod sa ilang mga sakyanan. Gikan sa PIA