Bisan kung wala ma-apil sa listahan sa mga mahimong bayaran sa Employees Compensation Commission (ECC) ang empleyado nga masakit sa corona virus disease (COVID), may higayon nga mahimo pa gihapon sila nga makakuha sa maong benepisyo alang sa mga empleyado.
Kini maoy gipasabut sa sa Regional information Officer sa ECC nga si Ingrid Yumang atul sa usa ka webinar kabahin sa mga programa sa kagamhanan nga magamit sa mga empleyado niining panahon sa pandemya.
Matud pa ni Yumang, ang ECC usa ka ahensya nga nahimong sanga sa Department of Labor and Employment (DOLE) ug maoy naghupot ug nagdumala sa Employees Compensation and Employees Fund.
Usa sa ilang gimbuhaton mao ang pagtabang sa mga empleyado nga madisgrasya, masakit o ma-apil sa aksidente samtang sila ana-a sa ilang pagpanarbaho sa mga buhatang pribado o publiko.
Ang pondo sa ECC gibayran sa mga employers sa pribadong sector sa tag P10.00 matag buwan kon ang sweldo sa empleyado ubos pa sa P14,750 ug P30.00 matag buwan kon ang sweldo taas pa sa P14,750, segun pa ni Yumang didto sa webinar.
Sa mga trabahante sa gobyerno, silang tanan, nagahatag ug tag P100 matag buwan: madaku man ug magamay ang ilang suhulan.
Midugang si Yumang sa pag-ingon nga adunay listahan sa 32 ka mga risgo nga giatubang sa mga trabahante/empleyado nga mamahimong mabayran sa ECC kung mahitabo nga sila ma-aksidente.
Gawas sa 32 ka mga risgo nga nahisgutan sa maong listahan, aduna pay dugang nga gitawag ug “increased risk theory” nga gamiton aron pagatan-awon kung angayan ba nga makakobra ang empleyado/trabahante sa dugang nga kandtdad ilabi na kung ang mga panghitabo adunay kalabutan sa iyang katungdanan o aktwal nga trabaho, o kung adunay koneksyon ang maong panghitabo sa iyang aktwal nga gimbuhaton.
Bisan kung wala mahi-apil ang COVID 19 sa listahan sa 32 ka mga risgo sa trabaho sa usa ka empleyado, nasukip gihapon kini sa “increased risk theory”.
Hinuon gitin-aw ni Yumang nga bisan pa nga makakuha ang mga empleyado sa tabang sa ECC kung pananglit matakdan sila sa Covid 19, ang gitumbok nga maka claim sa maong balayranan mao lamang ang mga medical frontliners.
Midugang si Yumang sa pag-ingon nga mahimong ‘invalid’ ang claim sa usa ka ‘medical frontliner’ kung mamatud-an nga siya nagdanghag sa iyang pagpanarbaho ug wala kini mosunod sa mga protocol kabahin sa pagpanilop sa iyang kaugalingon samtang siya nanarbaho. (rahchiu/PIA-7/Bohol)