Katawhan sa barangay Cambigsi mibakwi sa ilang suporta sa NPA  

Katawhan sa barangay Cambigsi didto sa lungsod sa Bilar, ang mibakwi sa ilang suporta ngadto sa New People’s Army (NPA).

Kini maoy gipamahayag ni 1st Lt. Elma Grace Remonde, ang Civil Military Relations Officer sa 47th Infantry Battalion (IB) sa Philippine Army (PA) nga nagbase sa Carmen, Bohol atol sa pakighinabi sa The Bohol Tribune.

Ang barangay Cambigsi sa Bilar, Bohol nga usa ka mass supporter sa NPA dinhe ang misaway sa mga terroristang kalihokan sa mga sakop sa New People’s Army ug gipadayag nga dili na kini sila mosuporta sa mga kalihokan sa NPA. .

Matod pa ni First Lieutenant Remonde nga ang gihimo sa barangay Cambigsi, Bilar sinaksihan sa mga opisyal sa kagamhanang local sa Bilar, Bilar Municipal Police Station, 47th Infantry Battalion sa Philippine Army ug ang kagamhanang probinsyal sa Bohol.

Dugang pamahayag ni Remonde nagaingon nga ang kanhi NPA mass supporters uban ang mga barangay officials ang nanumpa nga sila motamod na sa mga balaod. Gihimo kining pagpanumpa ngadto sa pangagamhanan sa Bilar atol sa usa ka kalihukan didto sa barangay hall sa Cambigsi, niadtong Oct. 11, 2020.

Gipasabot ni Remonde nga ang pagpanumpa nila sa balaof nagpasabot nga dili na sila mohatag ug suporta sa NPA pinaagi sa physical, material ug financial nga pamaagi.

Gihimo usab sa mga taga barangay Cambigsi ang pagtuybo sa mga placards nga nagpadayag sa mensahe nga undangon na nila (NPA) ang pagpanghulga sa ilang komunidad ug hunungon na nila ang terroristang kalihokan sa nasod. Gisunog usab sa taga barangay ang bandila sa CPP-NPA-NDF nga timailhan nga sa ilang pagsalikway sa ilang suporta sa NPA.

Gibutyag ni Remonde nga gipadayag sa katawhan sa barangay Cambigsi, Bilar nga mga myembro sa CPP-NPA-NDF nga Persona Non-Grata sa ilang barangay. (Dave Charles Responte)