Sinulat ni Elvira Bongosia
Gidayeg ang mga lakang nga gibuhat sa gitawag nga “City of Friendship” ug giila isip “Most Business Friendly City, ang dakbayan sa Tagbilaran batok sa coronavirus disease (COVID-19) pandemic.
Sa pagka karon, mapasalamaton ang dakbayan tungod kay walay natala nga nakalas nga kinabuhi dinhi tungod sa COVID-19. Pagkakaron, labaw na sa 90% ang recovery rate sa mga pasyente ug gamay na ang mga kaso sa mga natakdan sa maong makamatay nga sakit.
Sa gipangunahan nga tulumanon ni Presidential Communications Operations Office (PCOO) Kalihim Martin Andanar, Biyernes sa buntag, gibutyag ni Tagbilaran City Mayor John Geesnell “Baba” Yap II nga ang sayo ug estriktong pag-implementar sa lockdown aron daling mapugngan ang pandemya, maoy usa sa dagkong hinungdan nga gamay ra ang mga kaso sa Covid 19. Dili lang kini alang sa dakbayan, apan lakip na ang sitwasyon sa tibuok lalawigan sa Bohol.
“In order to promptly contain the virus, the local government of Tagbilaran City immediately ordered a lockdown on March 16. We suspended classes and curfew was ruled until 9:00 p.m. Large gatherings were prohibited like weddings, birthday parties, and fiesta celebrations and imposed home quarantine strictly allowing only one person per household to have a quarantine pass to go out for basic necessities,” matud pa ni Yap.
Sa pagka karon, adunay 53 ka natalang kaso sa COVID-19 sa dakbayan diin 49 o katumbas sa 92% sa mga positibong kaso ang nangaayo.
Duha lamang niini ang matawag nato nga active cases: usa ka Locally Stranded Individual ug laing usa ka kaso sa APOR (authorized person outside residence) Mao kini ang gisulti sa Bohol Inter Agency Task Force (BIATF).
Matud pa ni Mayor Yap nga ang lokal nga pangagamhanan sa dakbayan, mihatag ug suporta sa mga medical frontliners pinaagi sa paghatag kanila ug mga libreng personal protective equipment, libreng flu vaccination ug libreng pagpasakay tungod kay mihunong man sa operasyon ang mga pampublikong salakyanan.
Gidugang pa sa batan-ong mayor pagtaho nga may libreng transportasyon usab nga ilang gihatag sa mga pasyenteng nag-dialysis nga kinahanglang moadto sa mga tambalanan o sa mga medical facilities alang sa ilang regular nga pagpatambal.
Kauban sa Sangguniang Kabataan o kanang gitawag ug SK Federation sa dakbayan, nagmugna ug online shopping platform ang kagamhanang dakbayan aron dali nilang matabangan ang mga ginsakupan niini nga makapalit sa mga grocery items. Usa usab kini ka paagi nga mapugngan sa katawhan ang ilang pag gawas-gawas gikan sa ilang mga panimalay aron mupalit sa ilang mga gikinahanglan didto sa mga tindahan.
Si Yap mibutyag nga gipasiugdahan usab sa kagamhanang dakbayan ang ‘Balay to Balay Health Check-Up,’ nga nagdala sa mga doktor direkta sa mga pultahan sa mga residente aron dili nga kini kinahanglan pang mogawas aron magpa konsulta.
Aron mapanalipdan ang mga daling matakdan sa sakit, nihatag usab ang dakbayan ug libreng vaccine shots ngadto sa mga senior citizens ug lakip usab sa mga frontliners sama sa police, jail personnel ug mga kawani sa city hall.
Gipadayon usab ang regular nga pag-disinfect sa mga pampublikong lugar sama sa mga plaza ug sidewalks, matud pa ni Yap.
Gibutyag usab sa mayor nga aron pagsiguro nga magpabiling luwas ang lalawigan, ang kagamhanang dakbayan nihatag ug libreng COVID-19 RT Polymerase Chain Reaction (PCR) Test ngadto sa mga locally stranded individuals ug namalik nga overseas Filipino workers sa dili pa papaulion gikan sa mga quarantine facilities.
Kalabot sa food relief assistance, miingon si Yap nga ang lokal nga kagamhanan sa syudad nakahatag ug tagsa ka sakong bugas nga tag 50 ug 25 kilo gawas pa sa mga grocery itemsnga gipangapud-apod sa upat ka bugso.
Karong gipaubos sa modified general community quarantine status ang tibuok lalawigan, gibutyag sa mayor nga hinay-hinay nang nagbukas ang mga business establishments sa dakbayan sa Tagbilaran, apan gipatuman ang hugot nga health protocols aron mapabilin ang ubos nga kaso sa COVID-19 sa lokalidad.
Gi-awhag sa batan-ong mayor ang publiko sa paghimo sa health protocols isip ‘daily habit’ug dili kalimtan ang kanunay nga pag-ampo aron daling matapos kining pandemya.