Usa ka ex-Army reservist ang giingong gipusil patay didto sa lungsod sa Batuan ug ang gikatahapan sa maong krimen gituohang sakop sa New People’s Army (NPA), matud sa taho nga nahipos sa The Bohol Tribune niadtong adlaw Huwebes, Nov. 5, 2020.
Matud sa susamang taho, gi-ila ang biktima nga si Diosdado Diez, 48, taga barangay Poblacion.
Dugang nga asoy sa taho nga ang biktima, nagmaneho s usa ka motor uban ang iyang 17 anyos nga pag-umangkon.
Matud pa sa taho nga tulo ka gikatahapan ug duha ka look-out ang naghulat sa kasagbotang bahin sa barangay Rosariohan, Batuan, Bohol.
Gikan ang biktima ug ang iyang pagumangkon sa barangay Rizal aron mosimba ug padulong sa pagpauli ngadto sa barangay Poblacion, Batuan sa dihang giatangan ang biktima sa mga suspetsado ug gipusil.
Samtang gisulat kining balita, wala pa matino kon kinsa ang mga gikatahapan nga mipahigayon sa makalilisang nga krimen.
Sa pagkakaron, gihimoan ug pakisusi ang maong panghitabo sa kapulisan sa lungsod sa Batuan ug mitumaw ang posibilidadbnga sakop sa NPA ang anaa sa luyo sa maong krimen gumikan sa kamatooran nga ang biktima usa ka tigtug-an ug impormasyon ngadto sa mga militar.
Sa panahon nga gisulat kining maong balita, padayon ang gihimong pakisusi sa mga sakop Sa Batuan Police Station.