Gikatakda nga tukion sa Sangguniang Panlalawigan (SP) sa Bohol ang laraw nga mangutang ug P1 bilyon alang sa pagpaugmad sa agrikultura dinhi sa probinsya.
Ang Committee on Finance, Budget and Appropriations sa SP sa Bohol ang motuki sa laraw human adunay duha ka resolusyon nga nga makigalayon sa Land Bank of the Philippines (LBP) ug sa Development Bank of the Philippines (DBP) alang sa paghuwam ug kwarta nga gamiton sa kaugmaran sa pag-uma dinhi sa lalawigan.
Ang utangon nga kwarta gilaraw nga gamiton sa pagpalit ug kahimanan alang sa pag-uma.
Matud sa mga taho nga nahipos sa The Bohol Tribune nga gahinan usab ug pondo gikan sa utangon nga kwarta alang sa patubig.
Dugang pa sa mga taho nga gilaraw nga ugmaron ang panubig sa 18 ka mga lungsod nga sakop sa segundo ug tersero distrito ning lalawigan sa Bohol. Gilaraw usab nga adunay usa ka lungsod sa unang distrito ang makadawat ug tabang gikan sa kagamhanan alang sa pagpaugmad sa panubig.
Matud pa sa mga tinubdan nga gamiton ang kantidad nga utangon alang sa pagpalit ug post harvest facilities aron makatabang sa pagsulbad sa mga suliran sa agrikultura.
Sa pagkakaron, tuki-on ang laraw nga muhulam ug kwarta ang kagamhanan sa Committee on Budget, Finance, Appropriations pinangulohan ni Vice Governor Rene Relampagos.
Sumala pa ni Relampagos nga gilaraw nga P125 milyon ang igahin ngadto sa sektor sa pangisda isip paagi sa pagseguro sa pagkaon ug mahimo nga mapaubos ang presyo sa isda nga gibaligya sa merkado.