Mipasidaan ang Civil Service Commission (CSC) sa publiko batok sa mga pekeng online announcement gikan sa mga review classes nga nag-ingon nga 90% ang ilang passing rate, matud pa sa taho sa Philippine Information Agency (PIA) nga gipadala sa buhatan sa The Bohol Tribune niadtong Huwebes, Nob. 19, 2020.
Ang pahayag sa CSC nagaingon nga wala sila’y gi-endorso o gi-accredit nga bisan unsang review center nga nagtanyag ug klase sa mga examinees.
Dugang pahayag pa sa CSC nga ang mga review centers nga nag-ingon nga accredited sila, dili konektado sa komisyon bisan kanus-a.
Ang Career Service Examination (CSE) usa ka general ability test nga magsilbing ‘basic gauge’ nga nakadisensyo aron mahibaw-an ug masuportahan ang merito ug katakos sa usa ka indibidwal alang sa government career service.
Gitambagan sa CSC ang publiko nga moadto lamang sa ilang official website nga csc.gov.ph ug official Facebook page nga fb.com/civilservicegovph ug sa ilang rehiyonal nga mga buhatan alang sa mga lehitimong impormasyon aron malikayan ang pagkatap sa mga pekeng balita o fake news.