Ang duha ka mga kompanya sa abyon, ang Philippine Airlines (PAL) ug ang Air Asia Philippines (AAP) mubalik na sa ilang regular nga eskedyul sa byahe aron pag-serbisyo sa rota nga Manila-Panglao, vice versa.
Matud pa sa taho gikan sa Philippine News Agency niadtong Huwebes, Nob. 19, 2020, ibalik na sa PAL ang panaw sa ilang abyon sugod karong adlaw nga Dominggo, Nob. 22, 2020.
Matud pa sa tigpamaba sa PAL nga si Cielo Villaluna, ang pagbalik sa regular nga byahe sa abyon nitunong usab sa pag-abli ug balik sa turismo sa Bohol, hinoon limitado lang sa mga kalihukan nga gihinganlan ug meetings, incentives, conferences, ug exhbitions (MICE).
Regular ang byahe sa abyon sa PAL gikan sa Manila paingon sa Panglao ug balik sa Manila. Adunay byahe sa PAL kada adlaw sa Miyerkules, Biyernes, ug Domingo.
Sayo niini, mitaho ang AAP nga ibalik na nila ang regular nga buahe sa ilang abyon sugod karong Dec. 1, 2020 diin kaupat sa usa ka semana ang eskedyul sa mga byahe sa naasoy nga kompanya sa abyon.
Matud pa sa laing taho gikan sa Philippine News Agency, sugod sa Dec. 1 ngadto sa Dec. 15, 2020, kaupat sa usa ka semana ang biyahe sa AAP nga pagahimoon matag Martes, Huwebes, Biyernes ug adlaw nga Domingo. Pag ka Dec. 15 ngadto sa Dec. 30, 2020, matag adlaw na ang eskedyul sa byahe sa maong kompanya sa abyon.