Kapin sa P260,000 nga kantidad sa gituohang shabu ang nasakmit sa kapulisan human sa usa ka buy bust operation nga gipahigayon didto sa lungsod sa Panglao.
Ang buy bust operation nahitabo 10:30 ang takna sa kagabhion adlaw nga Miyerkules, Dis. 2, 2020, matud pa sa taho gikan sa kapulisan.
Dugang pa nga asoy, ang mga tinugyanan sa kapulisan pinanguluhan ni Lt. Amelito Meloria ug inabagan sa mga sakop sa Philippine Drug Enforcement Agency (PDEA) dinhi sa Bohol mipahigayon ug naasoy na operasyon didto sa Purok 7, Alona Beach Area, barangay Tawala, Panglao.
Gipaila sa kapulisan ang mga gikatahapan nga mao si Rex Jesson Bumaat, 27, taga VP Inting Ave., sa dakbayan sa Tagbilaran ug ang kauban niini nga si Abundio Membreve, 49, taga barangay Catigbi-an, lungsod sa Buenavista.
Dugang pa sa taho, nga usa ka undercover nga pulis ang mipalit ug usa ka putos sa gituohang shabu sa mga suspek ug kini adunay kantidad nga P25,000.
Human sa transaksyon, gidakop sa kapulisan ang mga suspetsado. Sa dugang nga pakisusi sa kapulisan, laing pinotos nga gituohang shabu nga motimbang ug 25 gramos ug kini nagkantidad ug P238,000.
Sa kinatibuk-an, mokabat sa P263,000 ang kantidad sa gituohang shabu ang nakuha sa duha ka gikatahapan atol sa maong operasyon.
Kasamtangang gibilanggo karon ang mga suspek sa selda sulod sa estasyonan sa kapulisan sa Panglao ug giandam na ang sumbong nga ipasaka batok kanila.