Gusto ni Presidente Rodrigo Duterte nga mohatag ang nasudnong kagamhanan ug libreng testing alang sa Coronavirus disease (Covid) ngadto sa mga ordinaryong byahero ilabi na kadtong mga kabus.
Sa iyang senimanang public address niadtong adlaw nga Lunes, Dis.7, 2020 miingon si Duterte nga iyang gitahasan si Kalihim sa Kasanihan Francisco Duque III ug ang chief implementer sa National Task Force Against Covid Sec. Carlito Galvez nga hinuktukan ang mga paagi nga makahatag ug libre nga reverse transcription-polymerase chain reaction (RT-PCR) ngadto sa mga byahero nga padulong sa mga probinsya o katong manguli sa ilang mga probinsya.
Matud sa presidente nga mangita sya ug kwarta aron pondohan ang libreng testing alang sa Covid nga itanyag sa mga hospital sa kagamhanan o mga health centers.
Dugang sa presidente nga ganahan siya nga ipatuman ang maong programa sa ikaduhang kwarter sa 2021.
Sa mga pribadong laboratoryo, ang presyo sa RT-PCR mokabat ug P 4,500 ngadto sa P 5,000. Sa mga laboratoryo sa kagamhanan ang presyo sa RT-PCR gitakda sa P3,800, matud pa ni Duque.
“At ang Philhealth naman ay patuloy na nagbabayad. Ang pinakamataas pong bayad ng PhilHealth is P3,409. So maliit na lang po ‘yung idadagdag iyong out of pocket parang 400 pesos na lang po,”
(Ang Philhealth padayon gihapon nga mobayad. Ang kinamahalan nga bayad sa Philhealth kay P3,409. Mao gamay nalang ang ipuno nga out-of-pocket tingali P400.)
Sa mga matakdan sa virus, gusto sa presidente nga ang maong mga pasyente ibutang sa mga bakante nga lawak sa mga hotel.
“I’ll leave it to the city government and we will talk about it later. Itong mga hotel na bakante tutal pagkatapos niyan, you can always decontaminate the rooms,” matud sa
presidente.
(Akong itugyan sa mga kagamhanang dakbayan ug magsabot na lang kami unya. Kining mga bakanteng lawak sa mga hotel tutal inig human, mahimo man nga i-decontaminate ang mga lawak)
Mihangyo ang presidente sa mga tag-iya sa mga hotel nga tabangan ang ilang kababayan nga Pilipino karon nga adunay nasudnong kalisud ug mohangyo usab siya sa mga magbabalaod aron mabayran usab ang mga tag-iya sa hotel nga gamiton alang sa mga natakdan sa Covid. (PIA)