Mibahad si Presidente Duterte sa mga opsiyal sa Toll Regulatory Board (TRB) nga aduna silay himoong revamp sa nahisgotang ahensya kalabot sa reklamo sa publiko kabahin sa implementasyon sa radio frequency identification (RFID) system.
“Ito may system but actually it’s flawed, and the people behind this are really incompetent,” matud pa sa presidente nga nasigmuyo sa pagpatuman sa maong sistema.
(Kini adunay systema. Hinoon, sa tinuo-ray aduna kini depekto, ug ang mga nagpatuman sa sistema pulos dili makamao.)
Ang RFID system usa ka ID system nga migamit sa wireless communication diin adunay pag-transfer sa data gikan sa usa ka RFID tag ug sa antenna.
Sumala sa presidente, naghimo unta ug trial ang mga nagpatuman sa maong sistema ug makita unta ang mga problema nga mitumaw. Gipatuman kini aron mas dali ug hapsay ang pagbayad ug toll fee sa mga motorista ngadto sa mga nag operate ug mga toll highways o mga dalan nga adunay bayad kon muagi ka.
Ang pagpatuman sa RFID nagresulta ug mga taas nga traffic sa mga toll booths nga maoy nakahatag ug kahasol sa mga motorista.
Gitahasan ni Duterte si Transportation Sec. Arthur Tugade nga tawagan ang atensyon sa TRB aron sulbaron ang suliran.
Gipaspasan ang pagpatuman sa cashless payment system sa mga toll booths human 270 ka mga empleyado nga maoy nagtrabahonnsa mga toll gates ang natakdan ug Coronavirus disease (Covid).