Gigamit sa terroristang New People’s Army (NPA) dinhi sa Bohol ang pagpatay sa mga tawo aron makapanghadlok sa katawhan nga modapig sa militar aron makab-ot ang kahapsay ug kalinaw sa katilingban.
Kini maoy gipadayag ni 1Lt. Elma Grace Remonde, ang Civil Military Officer (CMO) sa 47th Infantry Battalion sa Philippine Army nga nagbase sa Camp Rajah Sikatuna, Katipunan, Carmen atol sa pakighinabi sa The Bohol Tribune.
Kahihumduman nga gipatay sa mga gituohang mga sakop sa NPA ang usa ka 66 anyos nga babaye nga taga lungsod sa Sevilla, karong sayong bahin sa Disyembre 2020.
Matod sa CMO sa Philippine Army dinhi nga gusto sa mga rebelde nga mahibaw ang mga sibilyan nga andam mopatay ang mga rebelde sa mga myembro sa komunidad nga modapig sa militar nga makab-ot ang kahapsay ug kalinaw sa katilingban.
Ang pagpatay usa lamang ka propaganda sa mga terorista aron hadlokon ang komunidad nga mahigugmahon sa hapsay ug kalinaw, matud ni Remonde.
Gidugang ni Remonde nga ang gipatay nga si Germenihilda Dologuin nga taga Sevilla dili asset sa Philippine Army dinhi apan possible nga kini asset sa mga kanhi unit sa militar nga nadestino dinhi sa lalawigan sa Bohol.
Gikondinar ni Remonde nga ang pagpatay nga usa ka paglapas sa tawhanong katungod.
Sa laing bahin, giklaro ni Remonde nga walay ceasefire ang militar tali sa NPA pinasubay sa mando ni Presidente Rodrigo Duterte.