Nakalitan ang ginikanan sa usa ka 3 anyos nga bata human mi-order kini ug mga butang sa usa ka online shopping site ug wala magpahibalo ug wala usab mahibalo ang iyang mga ginikanan.
Apan bisan kung wala mahibalo ang mga ginikanan, gibayran gihapon ang gi-order sa ilang 3 anyos nga anak. Mikabat ang kantidad sa mga gi-order nga bata ngadto sa P4,000.
Ang bata, nga taga Catigbian, Bohol, namalit ug butang diin nakurat ang mga ginikanan sa pag-abot sa mga gipang-order.
Gitaho sa Cebu Daily News nga usa ka Marloue Mahumot nga uyoan sa bata ang misugid sa panghitabo.
Matud ni Mahumot nga niadtong Dis. 8, 2020, giingnan sya sa iyang pag-umangkon nga mupalit siya ug butang sa usa ka online shopping site. Gitug-anan pod sa bata ang iyang inahan sa laraw nga mopalit sa online shopping site.
Wala gihatagan ug pagtagad sa inahan ang gisulti sa bata nga mupalit sya ug butang sa usa ka online shopping site. Wala magdahum ang inahan nga mahimo sa anak nga mo-order sa online shopping site tungod kay 3 anyos ra ang edad sa bata, asoy ni Mahumot.
Niadtong Dis. 20, 2020, nakadawat ug text ang lola sa bata nga padulong sa ilang balay ang delivery man ug dala ang order ug ang bayad pinaagi sa cash on delivery.
Giingnan ang delivery man nga ikanselar ang order, apan dili na mahimo.
Mi-order ang bata ug usa ka rechargeable nga motorized nga bisikleta. Matud pa sa taho, gitaplan na lang ni Mahumot ang bayad sa bisikleta.
Mipalit usab ang bata ug duha ka rechargeable nga toy vehicle ug usa ka dulaan nga backhoe, pinaagi sa Shopee account sa inahan sa bata.
Ang kasinatian sa pamilya gisaysay ni Mahumot sa usa ka Facebook post nga nag viral.