Sinulat nj Dave Albarado gikan sa taho sa CNN Philippines
Dili mahimo nga mamili ang mga Pilipino ug unsang bakuna ang itupok kanila, ug dili usab pugson ang katawhan nga magpabakuna, matud pa sa Malakanyang.
Kini ang giluwatang pamahayag sa tigpamaba sa presidente nga si Harry Roque niadtong Lunes, Enero 11, 2021.
Matud pa niya, ang mga Pilipinong dili magpatupok kinahanglan nga mopirma ug waiver nga nagpasabut nga dili moangay magpabakuna.
Tanan, sumala pa ni Roque, adunay katungod nga matagaan ug hustong serbisyong health care, apan dili mahimo nga piliian kay daghan usab nga mga Pilipino ang gusto nga magpabakuna.
Miluwat ug pamahayag si Sec. Carlito Galvez Jr., ang vaccine czar didto sa Senado, nga magasugod ang pagpabakuna sa Metro Manila, Cebu ug Davao alang sa mga bakuna nga ginama sa Pfizer ug Moderna ang mga gikan sa Estados Unidos nga adunay 90% nga effectivity rate.
Sa laing bahin matud pa sa Director General sa Food and Drug Administration (FDA) nga si Eric Domingo, nga kinahanglan kaduha tupokan ang usa ka tawo. Ang buot ipasabut niini kinahanglan duha ka doses ang itupok sa matag tawo, matud pa sa tighimo sa bakuna.