Gisulat ni Elvira Bongosia
Gipahayag ni Presidente Rodrigo Roa Duterte nga gawasnong makapili ang mga gobernador ug mga mayor kung unsa ang paliton nilang bakuna batok sa Coronavirus disease (Covid).
Sa gipahigayong tigom kauban ang Cabinet members niadtong Miyerkoles, Enero 13,2021, miingon ang presidente nga mahimong mopili ang mga pangu sa nagkalain laing local government units (LGU) kon unsang bakuna ang ilang paliton alang sa ilang nasakupan.
“I’m now addressing to the mayors and governors. You can choose any vaccine you like to buy. Wala kaming pakialam kung ano ang pipiliin ninyo,” pahayag pa ni Duterte.
(Paminaw nga mayor ug gobernador. Mahimo nga makapili kamo kon unsang klasi sa bakuna ang inyong paliton. Wala mi labot kon unsa ang inyong giangayan.)
“Maraming local government units who opted to go on their own. Sila ang magbili, may pera sila, at sila ang mamili ng kanilang vaccine or whatever,” dugang pa sa presidente.
(Daghang local government units nga gusto nga sila ang mopalit, ug aduna sila’y salapi, ug sila ang mopili sa klase sa bakuna.)
Matud pa nga dili pugson ang tanan nga maghiusa sa ihatag nga bakuna sa nasudnong kagamhanan.
Sa pagkakaron, ang kagamhanang syudad sa Tagbilaran pa ang labing unang local government unit sa lalawigan nga nigahin ug pondo alang sa Covid vaccine.
Gitakda nang molagda ug asabutan ang kagamhanang syudad sa Tagbilaran ug British drugmaker nga AstraZeneca sa mga mosunod nga adlaw alang sa UK-based company nga maoy mo-supply ug bakuna alang sa dakbayan.
Samtang ang kagamhanang probinsyal sa Bohol mipahibalo nga si Gob. Arthur Yap mi-tugot sa supplemental investment plan (SIP) nga nagkantidad ug P100 milyon alang sa pagpalit sa bakuna batok sa Covid.